తెలంగాణలో ఇటీవల కురిసిన వడగండ్ల వానలతో పంటలను నష్టపోయిన రైతులకు కేసీఆర్ ప్రభుత్వం అండగా నిలుస్తుంది.ఈ మేరకు రైతులకు ఆర్థిక సాయం చేసేందుకు రూ.151.46 కోట్లు మంజూరు చేసింది.
వచ్చే వారం నుంచి నేరుగా రైతుల బ్యాంకు ఖాతాల్లో ఈ ఆర్థిక సాయాన్ని జమ చేయనున్నారు.ఇందుకు గానూ బాధిత రైతుల బ్యాంకు ఖాతాల వివరాలను అధికారులు ఇప్పటికే సేకరించారు.
ఇటీవల కురిసిన అకాల వర్షాల కారణంగా వరంగల్, మహబూబాబాద్, కరీంనగర్ తో పాటు ఖమ్మం జిల్లాల్లో భారీగా పంట నష్టం వాటిల్లింది.ఈ నేపథ్యంలో పంటలను స్వయంగా పరిశీలించిన సీఎం కేసీఆర్ రైతులను పరామర్శించారు.అనంతరం ఎకరానికి రూ.10 వేల చొప్పున నష్టపరిహారం అందిస్తామని హామీ ఇచ్చిన సంగతి తెలిసిందే.26 జిల్లాల్లో మొత్తం 1.31 లక్షల మంది రైతులకు ప్రభుత్వం ఈ ఆర్థిక సాయాన్ని అందించనుంది.
