మరీ శృతి మించిపోయిన ఏపీ అప్పులు..!

ప్రస్తుతం ఆంధ్రప్రదేశ్ తీసుకున్న అప్పుల వివరాలను వెల్లడించి కేంద్రప్రభుత్వం అందరికీ షాక్ ఇచ్చింది.ఆంధ్రప్రదేశ్ పెద్ద మొత్తంలో రుణాలు తీసుకుంటున్నదని అందరికీ తెలిసినప్పటికీ, ప్రస్తుత ప్రభుత్వం తీసుకున్న అప్పు గత ప్రభుత్వాన్ని మించిపోవడం ఇక్కడ గమనార్హం.

ఇక ఇప్పటి వరకు వైసీపీ తీసుకున్న అప్పులు చంద్రబాబు ప్రభుత్వంతో పోలిస్తే రెట్టింపు అయ్యాయని సమాచారం.తెలుగుదేశం పార్టీ రాజ్యసభ సభ్యుడు కనకమేడల రవీంద్ర కుమార్ అడిగిన ప్రశ్నకు ఆర్థిక శాఖ సహాయ మంత్రి పంకజ్ చౌదరి సమాధానమిస్తూ ఆంధ్రప్రదేశ్ అప్పులు 4,42,442 కోట్లకు చేరుకున్నాయని అన్నారు.

గత ప్రభుత్వంతో పోలిస్తే అప్పులు రెట్టింపు అవుతున్నాయని, ఏటా అప్పులు పెరుగుతున్నాయని కేంద్రమంత్రి అన్నారు.

ప్రస్తుతానికి అప్పులు 4,42,442 కోట్లకు చేరుకున్నాయని, బడ్జెట్‌లో పేర్కొన్న అంకెల్లో కొన్ని అప్పులు మాత్రమే ఉన్నాయని, రాష్ట్ర ప్రభుత్వం కార్పొరేషన్లు, ఇతర మార్గాల్లో తీసుకున్న రుణాలు ఎక్కువగా ఉంటాయని కేంద్ర మంత్రి చెప్పారు.రుణాలు తీసుకోవడం తప్పు కాదు… అంతకొస్తే ప్రతి రాష్ట్రం రుణాలు తీసుకుంటుంది.అయితే రాష్ట్ర ప్రభుత్వం తీసుకున్న రుణాలను ఏం చేస్తుందనేది ప్రశ్న.

రాష్ట్రంలోని అధికార పార్టీ సంక్షేమ పథకాలకు పెద్దపీట వేస్తోందని, బహిరంగంగానే ప్రచారం చేసుకుంటోందన్నారు.ప్రజలకు సంక్షేమం కావాలి కానీ అభివృద్ధి మాటేమిటి?.

రాష్ట్ర విభజన జరిగినప్పుడు ఆర్థిక వ్యవస్థ అప్పుల ఊబిలో కూరుకుపోయిందని, గత ప్రభుత్వం తీసుకున్న అప్పులు ఆర్థిక వ్యవస్థపై ఒత్తిడి పెంచాయన్నారు.గత ప్రభుత్వం హైకోర్టు భవనం, ఉద్యోగులు, ఇతర అధికారుల కోసం క్వార్టర్లు వంటి కొన్ని నిర్మాణాలను నిర్మించింది.కానీ వైసీపీ మాత్రం సంక్షేమ పథకాలపైనే దృష్టి సారిస్తోందని, ఆ పథకాలే పార్టీని మళ్లీ అధికారంలోకి తీసుకువస్తాయని విశ్వసిస్తోంది.ముఖ్యమంత్రి నుంచి కేబినెట్ మంత్రుల వరకు ఎమ్మెల్యేల వరకు అందరూ ఇదే మాట చెబుతున్నారు.