సోషల్ మీడియాలో నిత్యం చాలా వీడియోలు తారసపడుతూ ఉంటాయి.అయితే అందులో ఏ కొన్నో చాలా ప్రత్యేకతని సంతరించుకుంటూ ఉంటాయి.
ప్రస్తుతం వైరల్ అవుతున్న వీడియో కూడా చాలా స్పెషల్ అని చెప్పుకోవాలి.అదొక మెట్రోస్టేషన్.
ఆ స్టేషన్ అటునుండి పోయే ప్రయాణికులతో, ఇటునుండి పోయే ప్రయాణికులతో చాలా హడావుడిగా వుంది.ఆ మధ్యలో కూడా ఒక ఔత్సాహికుడు గిటార్ వాయిస్తూ ప్రయాణికులకు ఉపశమనం చేకూర్చే ప్రయత్నం చేస్తున్నాడు.
కానీ అతని ప్రయత్నం వృధాప్రయాస అయిపోయింది.ఇంతలో ఎక్కడినుండి వచ్చిందో తెలియదు గాని, ఓ క్యూట్ బేబీ అటుగుండగా వెళ్తూ అతగాడు వాయించిన గిటార్ శబ్దానికి స్థాణువై అలా చూస్తూ ఉండిపోతుంది.
ఆ చిన్నారిని చూసిన సదరు ఔత్సాహికుడికి మరింత ఉత్సాహం వస్తుంది.దాంతో మరింత హుషారుగా ఈ వీడియోలో అతగాడు ప్లే చేసిన విధానాన్ని మనం చూడవచ్చు.అక్కడ ఆయనను ఎవరూ పట్టించుకోకుండా వెళ్ళిపోతున్నప్పటికీ ఆ పాప మాత్రం ఆయన సంగీతం, పాటను వింటూ ఆయన వద్దే ఆగిపోయింది.
దీంతో తనకు దొరికిన ఒకే ఒక ప్రేక్షకురాలి కోసం ఆ సంగీతకారుడు చాలా ఆనందంగా పాట పాడుతూ, గిటారు వాయిస్తూ సరదాగా గాల్లో తేలిపోతాడు.ఇక్కడ చెప్పుకోదగ్గ విషయం ఏమంటే, ఆ పాప ఎటూ కదలకుడా నిలబడి ఆ సంగీతాన్ని వింటోంది.ఇందుకు సంబంధించిన దృశ్యాలను ఒకరు వీడియో తీయగా న్యూస్ మూవ్‌మెంట్ సంస్థ తమ సామాజిక మాధ్యమాల ఖాతాలో ఈ వీడియోను పోస్ట్ చేసింది.
హృదయాన్ని హత్తుకొనే ఈ వీడియో నెటిజన్లను అమితంగా ఆకట్టుకుంటోంది.ఆ సంగీతకారుడు ‘‘వాట్ ఏ వండర్ ఫుల్ వరల్డ్’’ పాట పాడుతూ గిటారు వాయించాడు.ఆ పాప అక్కడికి రాగానే ‘‘వాట్ ఏ వండర్ ఫుల్ గర్ల్’’ అంటూ లిరిక్స్ ను మార్చి పాడటం గమనించవచ్చు.
