ప్రస్తుతం దేశవ్యాప్తంగా బాలీవుడ్ నటుడు సోనూ సూద్ పేరు వినిపిస్తోందనే విషయం అందరికీ తెలిసిందే.కరోనా వైరస్ కారణంగా ప్రజలు తీవ్ర ఇబ్బందులు పడుతుండటంతో ఎలాంటి సహాయానికైనా తాను రెడీ అంటూ ముందుకు వస్తున్న ఈ నటుడు, తన సొంత ఖర్చులతో వారికి సహాయం చేస్తున్నాడు.
లాక్‌డౌన్ సమయంలో వలస కార్మికులను తమ సొంతూళ్లకు పంపేందుకు సోనూ సూద్ చేసిన సహాయం గురించి అందరికీ తెలిసిందే.
ఇక ఆ తరువాత ఏదో ఓ రకంగా ప్రజలకు సాయం చేస్తూ తన ప్రత్యేకతను చాటుకుంటున్న సోనూ సూద్, ఇటీవల చిత్తూరుకు చెందిన ఓ రైతుకు ట్రాక్టర్‌ను అందించి దేశవ్యాప్తంగా వార్తల్లో నిలిచాడు.
అయితే ఇప్పుడు పలువురు సెలబ్రిటీలు సోనూ సూద్‌ను ఫాలో అయ్యేందుకు రెడీ అవుతున్నారు.ఈ క్రమంలోనే బాలీవుడ్ బ్యూటీ తాప్సీ పన్ను కూడా తనవంతు సాయంగా ఓ విద్యార్ధి చదువు కోసం ఐఫోన్‌ను కొని పెట్టింది.
పీయూసీ పరీక్షల్లో 94 శాతం మార్కులు తెచ్చుకున్న కర్ణాటకు చెందిన ఓ విద్యార్ధినికి లాక్‌డౌన్ కారణంగా చదువుకోవడానికి సెల్‌ఫోన్ అవసరం అయ్యింది.
ఈ విషయాన్ని ఆమె తండ్రి సోషల్ మీడియాలో పోస్ట్ చేయగా, తాప్సీ ఈ పోస్ట్‌ను చూసి సదరు విద్యార్ధినికి ఐఫోన్‌ను అందించింది.
తాప్సీ చేసిన సాయం తనకు చాలా ఉపయోగపడుతుందని, ఆమె సాయం ఎప్పటికీ మరిచిపోలేనని ఆ విద్యార్ధిని సంతోషం వ్యక్తం చేస్తోంది.మొత్తానికి సోనూ సూద్ బాటలో మరికొందరు సెలబ్రిటీలు ముందుకు వచ్చి ఇలాంటి మంచి పనులు చేయాలని అభిమానులు కోరుతున్నారు.
