సాధారణంగా 100 అడుగుల ఎత్తులో ఉన్న సన్నని మార్గంలో నడవాలంటేనే గుండె వణికి పోతుంది.అలాంటిది జర్మనీకి(Germany) చెందిన ఇద్దరు స్లాక్‌లైన్‌ క్రీడాకారులు 2,500 మీటర్ల ఎత్తులో ఒక కొత్త ప్రపంచ రికార్డును సృష్టించారు! ఫ్రైడీ కుహ్నే, లుకాస్ ఇర్మ్లెర్ అని పిలిచే ఈ డేర్ డెవిల్స్ రెండు హాట్‌ఎయిర్ బెలూన్స్ మధ్య వేలాడుతున్న ఒక చిన్న తాడు మీద నడిచారు ఆ తాడు భూమి నుంచి దాదాపు మూడు కిలోమీటర్ల ఎత్తులో ఉందని తెలిసి అందరూ షాక్ అవుతున్నారు.
వారి సెన్సేషనల్ రికార్డుకు సంబంధించిన వీడియో ప్రపంచవ్యాప్తంగా వైరల్ అయింది.
ఈ వీడియోలో, ఫ్రైడీ కుహ్నే, లుకాస్ ఇర్మ్లెర్ ఎలా బ్యాలెన్స్‌ను కాపాడుకుంటూ నడుస్తున్నారో చూడవచ్చు.
మేఘాల కంటే ఎత్తులో వేలాడుతున్న రెండు భారీ బెలూన్స్ మధ్య వేలాడుతున్న ఈ చిన్న తాడు మీద వారు ఎంత ధైర్యంగా నడిచారో! ఇంతకు ముందు, 2021లో బ్రెజిల్‌లో(Brazil) వీరు 1,900 మీటర్ల ఎత్తులో నడిచి రికార్డును సృష్టించారు.కానీ ఈసారి, వారు దానికంటే 600 మీటర్లు ఎక్కువ ఎత్తులో నడిచి, కొత్త రికార్డును సృష్టించారు.
ఫ్రైడీ కుహ్నే, లుకాస్ ఇర్మ్లెర్ల ధైర్యసాహసాన్ని చూసి ప్రజలు ఆశ్చర్యపోయారు.ఒక సోషల్ మీడియా వినియోగదారుడు, “ఇలా చేయాలంటే నాకు ఒక తాడు మాత్రమే కాదు, ఒక పారాచూట్ కూడా కావాలి!” అని వ్యాఖ్యానించారు.కుహ్నే తన అనుభవాన్ని పంచుకుంటూ, జర్మనీలో ఇలాంటి ధైర్యసాహసాలకు అనుమతులు పొందడం ఎంత కష్టమో చెప్పారు.అంతేకాకుండా, తాను స్లాక్‌లైన్‌ నుంచి దూకి పారాచూట్‌తో కిందకు దిగాలనే కలను కూడా నెరవేర్చుకున్నానని పేర్కొన్నారు.“ఇది లూకాస్, నేను కలిసి చేసిన అత్యంత డేంజరస్ స్లాక్‌లైన్‌ రికార్డు” అని ఆయన అన్నారు.
ఫ్రైడీ, లుకాస్(Friede, Lucas) ఇద్దరూ స్లాక్‌లైన్‌ క్రీడలో ఎన్నో రికార్డులు సృష్టించారు.2019లో, ఇర్మ్లర్ రెండు కిలోమీటర్ల పొడవున్న ఒక చిన్న తాడు మీద నడిచి అత్యంత దూరం నడిచిన రికార్డును సృష్టించారు.అంతేకాకుండా, 2017లో ఫ్రైడీ 250 మీటర్ల ఎత్తులో ఉన్న 110 మీటర్ల పొడవున్న ఒక చిన్న తాడు మీద ఏ రకమైన భద్రతా పరికరాలు లేకుండా నడిచి మరో రికార్డును సృష్టించారు.
స్లాక్‌లైన్‌ అనేది ఒక రకమైన క్రీడ.ఇందులో, ఒక చిన్న తాడును రెండు స్థలాల మధ్య బిగించి, దాని మీద నడకలా ఆడతారు.ఇది సమతుల్యతను కాపాడే ఒక రకమైన వ్యాయామం కూడా.హైలైనింగ్, ట్రిక్ లైనింగ్, యోగా స్లాక్‌లైన్‌ వంటి విభిన్న రకాల స్లాక్‌లైన్‌ క్రీడలు ఉన్నాయి.
