భారతీయ సంస్కృతిలో జ్యోతిష్యానికి(Astrology in Indian culture) ఎప్పుడూ ప్రత్యేక స్థానం ఉంది.ఇప్పుడు డిజిటల్ ప్రపంచంలో దీని హవా మరింత పెరిగిపోయింది.
ఆస్ట్రోటాక్ లాంటి యాప్స్ పుణ్యమా అని జ్యోతిష్యం అందరికీ అందుబాటులోకి వచ్చేసింది.చాలామంది ఈ యాప్స్‌ని డౌన్‌లోడ్ చేసుకుని భవిష్యత్తు గురించి తెలుసుకునేందుకు ఆసక్తి చూపిస్తున్నారు.
అయితే, ఈ ఆస్ట్రోటాక్ యాప్‌తో (AstroTalk app)ఓ మహిళకు వింత అనుభవం ఎదురైంది.పెళ్లయిన ఆమె సరదాగా ఈ యాప్‌ను పరీక్షించాలని అనుకుంది.తన పెళ్లి గురించి జ్యోతిష్యుడిని అడిగితే.ఆయన చెప్పిన సమాధానం విని ఆమె షాక్ అయింది.
జ్యోతిష్యుడు(Astrologer) ఆమెకు మూడు సంవత్సరాల తర్వాత పెళ్లి అవుతుందని చెప్పాడు.దీంతో ఆ మహిళ వెంటనే “నేను ఆల్రెడీ పెళ్లి చేసుకున్నాను” అని జ్యోతిష్యుడికి రిప్లై ఇచ్చింది.
అంతే, జ్యోతిష్యుడు వెంటనే చాట్ నుంచి డిస్‌కనెక్ట్ అయిపోయాడు.ఆ తర్వాత ఆమెకు మిగిలిన ఉచిత సమయం కూడా వృథా అయిపోయింది.
ఈ విషయాన్ని ఆమె ఎక్స్‌లో పోస్ట్ చేసింది.
“నేను కూడా ఈ హడావిడికి లొంగిపోయి ఆస్ట్రోటాక్ యాప్ డౌన్‌లోడ్ చేసుకున్నా.సైన్ అప్ చేసినందుకు 10 నిమిషాల ఫ్రీ చాట్ ఇచ్చారు. జ్యోతిష్యుడిని పెళ్లెప్పుడు(astrologer) అవుతుందని అడిగాను.
ఆయన మూడేళ్ల తర్వాత అన్నారు.నేను ఆల్రెడీ పెళ్లయిందని చెప్పగానే చాట్ కట్ చేసేశారు.
నా మిగిలిన ఐదు నిమిషాల ఫ్రీ టైం కూడా పోయింది” అని ఆమె తన పోస్ట్‌లో రాసుకొచ్చింది.ఆమె పోస్ట్ క్షణాల్లో వైరల్ అయింది.
రెండు లక్షలకు పైగా వ్యూస్ వచ్చాయి.చాలామంది యూజర్లు ఆమెకు మద్దతు తెలిపారు.
యాప్స్ యూజర్ల సమాచారం ఆధారంగానే సమాధానాలు ఇస్తాయని, నిజమైన జ్యోతిష్యం కాదని అభిప్రాయపడ్డారు.జ్యోతిష్యం ఉపయోగకరమైన శాస్త్రమే కానీ, ఇలాంటి యాప్‌లు మాత్రం తప్పుదారి పట్టిస్తున్నాయని కొందరు అన్నారు.
“నేటికాలంలో చాలామంది జ్యోతిష్యులకు సరైన నాలెడ్జ్ లేదు.అమాయకుల్ని మోసం చేస్తున్నారు” అని ఒక యూజర్ కామెంట్ చేశారు.“ఆ జ్యోతిష్యుడు మీరు మీ ఆయననే మూడేళ్ల తర్వాత మళ్లీ పెళ్లి చేసుకుంటారని చెప్పి ఉండాల్సింది” అని మరొకరు సరదాగా కామెంట్ చేశారు.ఇంకొందరు యూజర్లు మరింత ఫన్నీగా స్పందించారు.“ఈ ట్విస్ట్‌కి నక్షత్రాలే షాక్ అయ్యాయేమో” అని ఒకరు అంటే, “ఆ జ్యోతిష్యం బహుశా మీరు మీ భర్తతో బంధాన్ని పునరుద్ధరించుకుంటారని చెప్పి ఉంటారు” అని ఇంకొకరు కామెంట్ చేశారు.
ఆస్ట్రోటాక్ యాప్ చాలా పాపులర్.
దీనికి 50 మిలియన్ల కంటే ఎక్కువ డౌన్‌లోడ్స్ ఉన్నాయి.వెబ్‌సైట్ ప్రకారం, ఈ యాప్‌లో 13,000 మందికి పైగా జ్యోతిష్యులు, న్యూమరాలజిస్టులు, టారో రీడర్లు, వాస్తు నిపుణులు ఉన్నారు.
తాము కచ్చితమైన, బాగా పరిశోధించిన జ్యోతిష్య సేవలను అందిస్తున్నామని కంపెనీ చెబుతోంది.
