అమెరికా అధ్యక్ష ఎన్నికలు : దూసుకెళ్తున్న కమలా హారిస్.. యువతను టార్గెట్ చేసిన ట్రంప్

అమెరికా అధ్యక్ష ఎన్నికల్లో డెమొక్రాటిక్ అభ్యర్ధిగా అధ్యక్షుడు జో బైడెన్( Joe Biden ) ఉన్నంత వరకు రిపబ్లికన్ నేత , మాజీ అధ్యక్షుడు డొనాల్డ్ ట్రంప్‌కు( Donald Trump ) ఎదురులేకుండా పోయింది.

బైడెన్ వయసు, వృద్ధాప్యం, తడబాటు కారణంగా ముందస్తు సర్వేలు, ఓపీనియన్ పోల్స్‌లో ట్రంప్ దూసుకెళ్లారు.

కానీ ఎప్పుడైతే బైడెన్ తప్పుకుని రేసులోకి ప్రస్తుత ఉపాధ్యక్షురాలు కమలా హారిస్ వచ్చారో నాటి నుంచి రాజకీయాలు మారిపోయాయి.డెమొక్రాట్ నేతలు, భారతీయ కమ్యూనిటీ ఆమెకు అండగా నిలుస్తున్నారు.

నల్లజాతికి చెందిన నేత కావడంతో ఆ వర్గం కూడా కమలా హారిస్ వైపు మొగ్గు చూపుతోంది.ఈ నేపథ్యంలో ట్రంప్ శిబిరం అలర్ట్ అయ్యింది.

కమలా హారిస్‌, డెమొక్రాటిక్ పార్టీ ఉపాధ్యక్ష అభ్యర్ధి టిమ్ వాల్జ్‌ను( Candidate Tim Walz ) టార్గెట్ చేసి విమర్శలు చేస్తోంది.అలాగే ఎన్నికల్లో తనకు మద్ధతిచ్చే యువకుల ఓట్లను ఎలా పొందాలనే దానిపై ఫోకస్ చేసింది.

డెమొక్రాట్ల పాలనలో అమెరికా ఆర్ధిక వ్యవస్ధ, దేశ పరిస్ధితిలో ఎలాంటి మార్పు లేకపోవడంతో ఈ పరిస్దితిని తనకు అనుకూలంగా మార్చుకోవాలని ట్రంప్ భావిస్తున్నారు.