రేపే ప్రమాణ స్వీకారం .. ఎయిర్‌ఫోర్స్ వన్‌లో వాషింగ్టన్‌‌కు చేరుకున్న ట్రంప్

Shiva Naga Prasad

NRI Reporter

2025-01-19   14:09:11  IST

అమెరికా అధ్యక్షుడిగా ఎన్నికైన డొనాల్డ్ ట్రంప్( Donald Trump ) సోమవారం ప్రమాణ స్వీకారం చేయనున్నారు.ఇందుకు సంబంధించిన ఏర్పాట్లు ఘనంగా జరుగుతున్నాయి.

Ad

దీంతో ట్రంప్ తన కుటుంబంతో కలిసి రాజధాని వాషింగ్టన్ డీసీకి( Washington DC ) చేరుకున్నారు.గడ్డకట్టే చలి, అత్యంత శీతల పరిస్ధితులు, వాతావరణ శాఖ హెచ్చరికల కారణంగా ప్రమాణ స్వీకారాన్ని ఆరు బయట కాకుండా లోపలికి మార్చారు.

కాపిటల్ రోటుండాలో( Capitol Rotunda ) డొనాల్డ్ ట్రంప్ ప్రమాణ స్వీకారం చేసి ఇక్కడి నుంచే దేశ ప్రజలను ఉద్దేశించి ప్రసంగించనున్నారు.

శనివారం సాయంత్రం 4.30 గంటల ప్రాంతంలో ట్రంప్ తన సతీమణి మెలానియా,( Melania ) వారి కుమారుడు బారన్‌తో( Barron Trump ) కలిసి పామ్ బీచ్‌లోని అంతర్జాతీయ విమానాశ్రయంలో అమెరికా అధ్యక్షుడి అధికారిక విమానం ఎయిర్‌ఫోర్స్ వన్‌లో వాషింగ్టన్ డీసీలోని డల్లెస్ విమానాశ్రయానికి చేరుకున్నారు.ట్రంప్ కుమార్తె ( Ivanka Trump ) ఆమె భర్త జారెడ్ కుష్నర్, వారి పిల్లలు మరో ప్రత్యేక విమానంలో రాజధానికి బయల్దేరారు.

అలాగే ట్రంప్ కుమారుడు ఎరిక్ , కోడలు లారాలు తమ కుటుంబానికి చెందిన ప్రైవేట్ జెట్‌లో వాషింగ్టన్‌కు చేరుకున్నారు.శనివారం రాత్రి వర్జీనియాలోని తన గోల్ఫ్ క్లబ్‌లో రిసెప్షన్, ఫైర్ వర్క్స్ కార్యక్రమాన్ని నిర్వహించారు.

ఇక్కడ జరిగే విందు కోసం దాదాపు 500 మంది అతిథులను ఆహ్వానించారు.