కాళేశ్వరం ప్రాజెక్టుకు అంత నష్టం వచ్చిందా?

ఇటీవల గోదావరి వరదల కారణంగా ఏపీ, తెలంగాణ రాష్ట్రాలు భారీగా నష్టపోయాయి.ముఖ్యంగా తెలంగాణలో గోదావరి ఉగ్రరూపం దాల్చడంతో భద్రాచలంలోని పలు ప్రాంతాలు నీటమునిగాయి.

అటు కాళేశ్వరం ప్రాజెక్టుకు కూడా భారీగా నష్టం వాటిల్లింది.కాళేశ్వరం ప్రాజెక్టులో కీలకమైన పంప్ హౌస్ మొత్తం నీటిలో మునిగిపోయింది.

దీనివల్ల వేల కోట్ల రూపాయల నష్టం జరిగే అవకాశం ఉందని నిపుణులు ఆందోళన పడుతున్నారు.ముఖ్యంగా లక్ష్మీపంప్ హౌస్‌లో 17 మోటార్లున్నాయి.ఇవన్నీ వరద నీటిలో మునిగిపోయాయి.200 అడుగుల పొడవు 35 అడుగుల వెడల్పు, 360 అడుగుల లోతులో కాళేశ్వరం పంప్ హౌస్‌ను ప్రభుత్వం ప్రతిష్టాత్మకంగా నిర్మించింది.ఇందులో 17 భారీ మోటార్లను బిగించారు.

వరద దెబ్బకు ఇపుడీ పంప్ హౌస్ మొత్తం మునిగిపోయింది.ఇందులోని నీటిని తోడేయాలన్నా కూడా పెద్ద కష్టమే.

నీటిని తోడితే కానీ మోటార్లు బయటపడవు.మోటార్లు బయటపడితే కానీ వాటి పరిస్ధితేంటో తెలియదు.

రక్షణ గోడ శకలాలు, భారీ క్రేన్, ఇనుప గేట్లు మోటార్లపై పడి పూర్తిగా దెబ్బతిన్నాయోమేనని నిపుణులు అనుమానం వ్యక్తం చేస్తున్నారు.మొత్తానికి వరదల ధాటికి అన్నారం, కన్నెపల్లి పంప్ హౌస్‌లు మునిగిపోవడంతో దాదాపు రూ.500 కోట్ల నుంచి రూ.800 కోట్ల దాకా నష్టం వాటిల్లిందని అనధికార అంచనా.ఇంత జరిగినా అక్కడేం జరగనట్లు రాష్ట్ర ప్రభుత్వం ఉండటం నిర్లక్ష్యానికి అద్దం పడుతోంది.