కెనడా: కేబినెట్ పునర్వ్యవస్థీకరించిన ట్రూడో .. భారత సంతతి మహిళా నేతకు ప్రమోషన్..!!

కెనడా ప్రధాని జస్టిన్ ట్రూడో( Canadian Prime Minister Justin Trudeau ) తన మంత్రి వర్గాన్ని పునర్వ్యవస్థీకరించారు.

ఈ సందర్భంగా భారత సంతతికి చెందిన మహిళా ఎంపీ అనితా ఆనంద్‌కు( MP Anita Anand ) ప్రమోషన్ కల్పించారు.

ప్రస్తుతం రక్షణ మంత్రిగా వున్న ఆమెను ట్రెజరీ బోర్డ్ అధ్యక్షురాలిగా నియమించారు.దీనిపై అనిత హర్షం వ్యక్తం చేశారు.

ట్రెజరీ బోర్డ్ ప్రెసిడెంట్ పదవిని స్వీకరించేందుకు తాను ఎదురుచూస్తున్నాని ఆమె వరుస ట్వీట్లు చేశారు.ప్రభుత్వ ఆర్ధిక బృందంలో భాగమైనందుకు గౌరవంగా వుందని అనిత అన్నారు.

గవర్నెన్స్, కేపిటల్ మార్కెట్‌లలో తనకున్న అనుభవంతో కెనడియన్లకు పటిష్టమైన ఆర్ధిక వ్యవస్థను నిర్మించేందుకు కృషి చేస్తానని ఆమె తెలిపారు.ఇప్పటి వరకు ఈ పదవిలో వున్న మోనా ఫోర్టీయర్‌కు అనిత ధన్యవాదాలు తెలియజేశారు.56 ఏళ్ల అనితా ఆనంద్ ఓక్ విల్లే నియోజకవర్గం నుంచి ప్రాతినిధ్యం వహిస్తున్నారు.కాగా.

మూడోసారి ప్రధానిగా బాధ్యతలు స్వీకరించిన జస్టిన్ ట్రూడో 2021 అక్టోబర్‌లో ‌తన కేబినెట్‌ను పునర్ వ్యవస్థీకరిస్తూ నిర్ణయం తీసుకున్నారు.ఈ క్రమంలో కీలకమైన రక్షణ శాఖ బాధ్యతలను అనితా ఆనంద్‌కు అప్పగించారు.

అప్పట్లో కెనడా రక్షణ మంత్రిగా భారత సంతతికే చెందిన హర్జీత్ సజ్జన్( Harjeet Sajjan ) బాధ్యతలు నిర్వర్తించారు.అయితే సైన్యంలో లైంగిక వేధింపుల అంశానికి సంబంధించిన దర్యాప్తులో ఆయన తీరుపై ప్రతిపక్షాలు, మీడియా దుమ్మెత్తిపోశాయి.

దీంతో స్పందించిన ట్రూడో సజ్జన్‌ను రక్షణ శాఖ నుంచి తప్పించి ఆ బాధ్యతలు అనితా ఆనంద్‌కు అప్పగించారు.