కెనడా : కిరాణా సరుకుల కోసం బయటికి .. కారులో శవమై తేలిన భారతీయుడు, రంగంలోకి పోలీసులు

కెనడాలో భారతీయుడు అనుమానాస్పద స్థితిలో మరణించాడు.మృతుడిని భారత్‌లోని పంజాబ్ రాష్ట్రం భోగ్‌పూర్‌లోని నంగల్ ఫిదా గ్రామానికి చెందిన భూపీందర్ సింగ్ రంధావా ( Bhupinder Singh Randhawa ) (38)గా గుర్తించారు.

2013లో కెనడాకు వెళ్లిన భూపీందర్ కుటుంబం కోసం శ్రమిస్తున్నాడు.ఇలా వుండగా ఈ వారంలో భూపీందర్ కనిపించడం లేదని అతని కుటుంబానికి సమాచారం అందింది.

కిరణా సరుకులు కొనుగోలు చేసేందుకు బయటకు వెళ్లిన భూపీందర్ మళ్లీ తిరిగి రాలేదని, అతని ఫోన్ స్పందించడం లేదని తెలిపారు.దీంతో ఆయన కుటుంబ సభ్యులు కెనడా పోలీసులకు సమాచారం అందించారు.

రంగంలోకి దిగిన పోలీసులు భూపీందర్ వాహనం రోడ్డు పక్కన నిలిపి వుండటాన్ని గుర్తించారు.కారును తనిఖీ చేస్తుండగా .అతను అపస్మారక స్థితిలో పడివున్నాడు.భూపీందర్‌‌ను హుటాహుటిన ఆసుపత్రికి తరలించగా.

అప్పటికే మరణించినట్లు వైద్యులు ధ్రువీకరించారు.భూపీందర్ మరణానికి దారి తీసిన కారణాలపై పోలీసులు ఆరా తీస్తున్నారు.

అతనికి భార్య, పదేళ్ల కుమార్తె వున్నారు.భూపీందర్ మరణంతో అతని స్వగ్రామంలో విషాద ఛాయలు అలుముకున్నాయి.

బంధుమిత్రులు, పలువురు రాజకీయ నాయకులు సింగ్ కుటుంబాన్ని పరామర్శించి ఓదార్చారు.