నిర్భయ నిందితుల ఉరిశిక్ష అమలు విషయం లో జాప్యం,ఆప్ పార్టీ నే కారణం అంటున్న కేంద్రమంత్రి

కేంద్ర మంత్రి ప్రకాష్ జవదేకర్ ఢిల్లీ ఆప్ పార్టీ వ్యవహార తీరుపై మరోసారి మండిపడ్డారు.2012 లో చోటుచేసుకున్న నిర్భయ ఘటన నిందితుల ఉరితీత విషయంలో జాప్యం జరగడానికి అసలు కారణం ఢిల్లీ లోని ఆప్ ప్రభుత్వమే అంటూ ఆయన సంచలన ఆరోపణలు చేశారు.

ఎప్పుడో జరిగిన ఈ కేసుకు సంబంధించి ఇప్పటివరకు దోషులకు శిక్షలు పడకపోవడానికి అక్కడి ప్రభుత్వమే కారణం అంటూ ఢిల్లీ సీఎం కేజ్రీ వాల్ పై ఆరోపణలు చేశారు.

నిర్భయ ఘటనలో న్యాయం జరగడంలో జాప్యానికి ఆప్ ప్రభుత్వానిదే బాధ్యత అని, మెర్సీ పిటిషన్ దాఖలుకు గత రెండున్నర ఏళ్లలో ఈ సర్కార్ ఈ దోషులకు ఎందుకు నోటీసు జారీ చేయలేదని ఆయన గురువారం జరిగిన ఒక మీడియా సమావేశంలో ప్రశ్నించారు.సుప్రీంకోర్టు ఉత్తర్వులు జారీ అయిన వారం రోజుల్లోగా ఆప్ ప్రభుత్వం నోటీసులు ఇచ్చి ఉంటే ఇప్పటికే ఆ నలుగురు దోషులను ఉరి తీసి ఉండేవారని, ఈ దేశానికి న్యాయం జరిగి ఉండేదని జవదేకర్ పేర్కొన్నారు.

జైలు నిబంధనల ప్రకారం ఒక కేసులో ఒకరికంటే ఎక్కువమందికి ఉరిశిక్ష విధించి ఉంటె వారిలో ఎవరైనా ఒకరు క్షమాభిక్ష పిటీషన్ దాఖలు చేసుకున్న పక్షంలో ఇతర దోషుల ఉరితీత కూడా వాయిదా వేయాల్సి పడుతుంది.