అమెరికాలో మరో కొత్త వైరస్.. 20 ఏళ్ల తర్వాత వెలుగులోకి ‘‘ మంకీపాక్స్ ’’ , టెక్సాస్‌లో తొలి కేసు

ఇప్పటికే వివిధ రకాల స్ట్రెయిన్లు పుట్టుకొస్తూ కరోనా కలవరపెడుతున్న వేళ అమెరికాలో మరో వైరస్‌ కలకలం రేపింది.

దాదాపు 20 సంవత్సరాల తర్వాత తొలిసారి మంకీపాక్స్‌ వైరస్‌ కేసు వెలుగుచూసింది.

టెక్సాస్‌కు చెందిన ఒక వ్యక్తిలో ఈ వైరస్‌ను గుర్తించినట్లు యూఎస్ సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (సీడీసీ) ప్రకటించింది.కొన్ని రోజుల కిందట నైజీరియా నుంచి వచ్చిన ఆ వ్యక్తికి అక్కడ మంకీపాక్స్‌ వైరస్‌ సోకి ఉండవచ్చని అభిప్రాయపడింది.

ఆ వ్యక్తిని ప్రస్తుతం డల్లాస్‌లోని ఆసుపత్రిలో ఐసొలేషన్‌లో ఉంచినట్లు వివరించింది.ఈ నేపథ్యంలో అధికారులు అప్రమత్తమయ్యారు.

ఈ వైరస్‌కి కూడా త్వరగా వ్యాపించే లక్షణం వున్నందున మరింత మందికి ఇది సోకకుండా నష్ట నివారణా చర్యలు చేపట్టారు.దీనిలో భాగం ఈ నెల 8,9 తేదీల్లో బాధితుడు ప్రయాణించిన రెండు విమానాల్లో అతడితో కలిసి ఉన్న ఇతర ప్రయాణికులను ట్రేస్‌ చేసి వారికి పరీక్షలు నిర్వహించేందుకు ఎయిర్‌లైన్స్‌, స్థానిక ఆరోగ్య సంస్థలతో కలిసి ప్రయత్నిస్తున్నట్లు సీడీసీ వెల్లడించింది.2003లో అమెరికాను మంకీపాక్స్ వణికించింది.దాదాపు 47 మందికి ఈ వైరస్ సోకింది.

మంకీపాక్స్ అంటే?

మంకీపాక్స్ వైరస్ జంతువుల నుంచి మనుషులకు సోకుతుంది.సాధారణంగా మధ్య, పశ్చిమ ఆఫ్రికాల్లో ఈ వైరస్ వ్యాపించే అవకాశాలు ఎక్కువ.ఇదికూడా కరోనా తరహాలోనే ఒకరి నుంచి మరొకరికి తుంపర్ల ద్వారా సోకుతుంది.

వ్యాధి సోకిన వారిని తాకినా.మంకీపాక్స్ వ్యాపించే అవకాశం ఉంది.

ఇది శరీరంలోకి పూర్తిగా విస్తరించడానికి 6 నుంచి 13 రోజులు పడుతుంది.ఒక్కోసారి 5 నుంచి 21 రోజుల సమయం కూడా పడుతుందని నిపుణులు వెల్లడించారు.

మంకీపాక్స్ లక్షణాలు:

జ్వరం, తలనొప్పి, వాపులు, నడుంనొప్పి, కండరాల నొప్పి, అలసట మంకీపాక్స్ లక్షణాలు.జ్వరం వచ్చే సమయంలో చర్మంపైన దద్దుర్లు, బొబ్బర్లు కూడా ఏర్పడే అవకాశం ఉంది.ఇవి సాధారణంగా అరిచేతులు, అరిపాదాల్లో వస్తుంటాయి.

దీని ద్వారా విపరీతమైన దురద లేదా నొప్పి కలుగుతాయి.ఒక్కోసారి మచ్చలు కూడా ఏర్పడవచ్చు.

ఈ లక్షణాలు 14 నుంచి 21 రోజుల్లో బాధితుడిలో బయటపడతాయి.ఇలాంటి సందర్భాల్లో ఓ వ్యక్తి నుంచి మరోవ్యక్తికి వ్యాప్తికి అవకాశాలు పెరుగుతాయని నిపుణులు చెబుతున్నారు.

ఈ వ్యాధిని అంతం చేయడానికి ఖచ్చితమైన చికిత్స లేదని సీడీసీ వెల్లడించింది.అయితే స్మాల్పాక్స్ వ్యాక్సిన్, యాంటీవైరల్స్ వంటి ఔషధాలు వాడొచ్చని సూచించింది.