రాజకీయాల్లో విలువలు, నైతికత అత్యంత ఆవశ్యకం - ఉపరాష్ట్రపతి వెంకయ్యనాయుడు

ఎన్నికల్లో ధనం, కులం, మతం ప్రాధాన్యతలు పెరుగుతున్నాయని, ఇది ప్రజాస్వామ్యానికి చేటు చేస్తుందన్న ఉపరాష్ట్రపతి ప్రజలు కూడా.కులం, మతం, ధనం కన్నా గుణం మిన్న అనే రీతిలో ఆలోచించి ఓటేయాలన్నారు.ప్రతికూల మార్పులను సకాలంలో గుర్తించి సరిదిద్దేందుకు ప్రయత్నించకపోతే ప్రజాస్వామ్యం బలహీనపడుతుందన్న ఉపరాష్ట్రపతి… వ్యవస్థలోని లోపాలను ప్రక్షాళన చేసి, విలువలతో కూడిన గమ్యం దిశగా ప్రపంచం మళ్ళినపుడే మెరుగైన సమాజం సాధ్యమవుతుందన్నారు.ప్రచార, ప్రసార సాధనాలు ప్రజాస్వామ్యపు నాలుగో స్తంభంగా ఈ దిశగా తమవంతు పాత్ర పోషించాలన్నారు.

పత్రికలు అందించే సమాచారం సత్యానికి దగ్గరగా, సంచనానికి దూరంగా ఉండాలన్న ఆయన, వార్తలు అద్దంలా సమాజాన్ని ప్రతిబింబించాలని, సరిదిద్దుకునే అవకాశం కల్పించేవిగా ఉండాలని సూచించారు.

ప్రముఖ రాజకీయ నాయకుడు, పేదల పక్షపాతి అయిన శ్రీ పిన్నమనేని కోటేశ్వరరావు గారి విగ్రహాన్ని ఆవిష్కరించడంపై హర్షం వ్యక్తం చేసిన ఉపరాష్ట్రపతి, 27 సంవత్సరాలు జిల్లాపరిషత్ చైర్మన్ గా పని చేసిన పిన్నమనేని కోటేశ్వరరావు అసాధారణ నాయకుడని తెలిపారు.

కృష్ణా జిల్లా ప్రభుత్వ పాఠశాలల అభివృద్ధి విషయంలో పిన్నమనేని చేసిన కృషి, ప్రభుత్వ ఉపాధ్యాయులను ప్రోత్సహించేందుకు వారు చేపట్టిన కార్యక్రమాలు నేటికీ ఆదర్శనీయమైనవన్నారు.విద్యార్థుల ప్రతిభ ఆధారంగా ఉపాధ్యాయులకు సన్మానాలు, పారితోషికాలు అందించేందుకు వారు శ్రీకారం చుట్టిన విషయాన్ని ఉపరాష్ట్రపతి గుర్తుచేశారు.

శ్రీ కోటేశ్వరరావు గారితో, వారి కుటుంబ సభ్యులతో తనకు వ్యక్తిగతంగా ఎంతో ఆత్మీయానుబంధం ఉందన్నారు.నాయకుడికి పర్యాయపదంగా నిలిచిన వెంకటేశ్వరరావు గారి జీవితం నుంచి యువత ప్రేరణపొందాలన్నారు.

ఈ కార్యక్రమంలో కృష్ణాజిల్లా జిల్లా ప్రజాపరిషత్ చైర్మన్ శ్రీ ఉప్పల హరికృష్ణ, ఆంధ్రప్రదేశ్ గృహనిర్మాణ శాఖ మంత్రి శ్రీ జోగి రమేష్, మచిలీపట్నం పార్లమెంట్ సభ్యులు శ్రీ వల్లభనేని బాల శౌరి, విజయవాడ పార్లమెంట్ సభ్యులు శ్రీ కేశినేని శ్రీనివాస్ (నాని), మచిలీపట్నం శాసనసభ్యులు, మాజీ మంత్రి శ్రీ పేర్ని వెంకట్రామయ్య (నాని), గుడివాడ శాసనసభ్యులు శ్రీ కొడాలి శ్రీ వెంకటేశ్వరరావు (నాని), ఆంధ్రప్రదేశ్ విప్ శ్రీ సామినేని ఉదయ భాను, మచిలీపట్నం మున్సిపల్ కార్పొరేషన్ మేయర్ శ్రీమతి మోక వెంకటేశ్వరమ్మ, కేంద్ర మాజీ విజిలెన్స్ కమిషనర్ శ్రీ కె.వి.చౌదరి, ఆంధ్రప్రదేశ్ మాజీ మంత్రి శ్రీ పిన్నమనేని వెంకటేశ్వరరావు తదితరులు పాల్గొన్నారు.