ఇంగ్లాండ్‌లోని షెఫీల్డ్‌లో( Sheffield ) ఒక షాకింగ్ ఘటన చోటుచేసుకుంది.అబ్బాసిన్ డైనర్( Abaseen Diner ) అనే రెస్టారెంట్‌పై కొందరు వ్యక్తులు దాడికి పాల్పడ్డారు.
ఈ దాడికి సంబంధించిన వీడియో సోషల్ మీడియాలో వైరల్ అవుతోంది.భారతీయులని భావిస్తున్న కొందరు వ్యక్తులు రెస్టారెంట్‌లోకి( Restaurant ) చొరబడి యజమానిపై దాడి చేయడంతోపాటు అద్దాలను ధ్వంసం చేశారు.
ఎక్స్, రెడిట్ వంటి సోషల్ మీడియా ప్లాట్‌ఫామ్స్‌లో ఈ వీడియో తెగ చక్కర్లు కొడుతోంది.
వీడియోలో దుండగులు రెస్టారెంట్ సిబ్బందిపై వస్తువులు విసురుతూ, అసభ్య పదజాలంతో దూషిస్తూ కనిపించారు.
ఒకానొక సమయంలో, ఒక వ్యక్తి దగ్గరున్న కర్రను లాక్కోవడానికి ప్రయత్నించగా, ఆ వ్యక్తి గట్టిగా పట్టుకుని తనను తాను కాపాడుకుంటూ దుండగుల్లో ఒకడి తలపై కొట్టాడు.ఈ వ్యక్తి రెస్టారెంట్ యజమాని అని, తనను తాను రక్షించుకునే ప్రయత్నంలోనే ఇలా చేశాడని కొందరు నెటిజన్లు అభిప్రాయపడుతున్నారు.
అనంతరం దుండగులు అక్కడి నుంచి పారిపోయారు.ఈ ఘటన మొత్తాన్ని వీడియోలో చూడవచ్చు.
మెనూలో గొడ్డు మాంసం( Beef ) వంటకాలు ఉండటమే ఈ దాడికి కారణమని చాలామంది సోషల్ మీడియా యూజర్లు కామెంట్లు చేస్తున్నారు.అయితే, మరికొందరు మాత్రం ఇది నిజం కాదని వాదిస్తున్నారు.గొడ్డు మాంసం గురించిన ఫిర్యాదులే నిజంగా దాడికి కారణమయ్యాయా అనేది ఇంకా నిర్ధారణ కాలేదు.అంతేకాకుండా, ఈ వీడియో, ఆడియోల ప్రామాణికతపై కూడా సందేహాలు వ్యక్తమవుతున్నాయి.దీనిపై పూర్తి విచారణ జరగాల్సి ఉంది.
ఈ దాడి ఘటనపై పోలీసులు వెంటనే స్పందించారు.కేసు నమోదు చేసుకుని దర్యాప్తు ప్రారంభించారు.ఐదుగురు వ్యక్తులను అరెస్టు చేసినా, ఆపై వారిని బెయిల్‌పై రిలీజ్ చేశారు.ఈ దాడిలో అద్దాలు, తలుపులు ధ్వంసం కావడంతో సుమారు £2,000 (రూ.2 లక్షలు) నష్టం వాటిల్లిందని రెస్టారెంట్ యజమాని తెలిపారు.అదృష్టవశాత్తు ఎవరికీ తీవ్ర గాయాలు కాలేదు.కొన్ని నెలల క్రితమే ప్రారంభమైన ఈ రెస్టారెంట్‌లో గ్రిల్డ్ చికెన్, మటన్, బర్గర్లు, కబాబ్‌లు వంటి వివిధ రకాల మాంసాహార వంటకాలు అందుబాటులో ఉన్నాయి.
ప్రస్తుతం పోలీసులు ఈ ఘటనపై లోతుగా దర్యాప్తు చేస్తున్నారు.దాడి కారణంగా జరిగిన నష్టానికి పరిహారం కోరుతున్నారు రెస్టారెంట్ యజమాని.
