రాజన్న సిరిసిల్ల జిల్లా:ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం బాబు జగ్జీవన్ రామ్ వ్యవసాయ కళాశాల యొక్క దత్తత గ్రామమైన రాళ్లపేటలో శుక్రవారం రోజున వ్యవసాయ కళాశాల సహాయ ఆచార్యులు రైతులకు కూనారం సన్నాలు అనే వరి రకం విత్తనాలను పంపిణీ చేశారు.వరిలో విత్తన శుద్ది పై అవగాహన కార్యక్రమం నిర్వహించారు.
ఈ సందర్భంగా డా.జె.రాజేందర్ రైతులకు విత్తన శుద్ధి ప్రాముఖ్యత వివరిస్తూ రైతులకు స్వయంగా విత్తన శుద్ది ఎలా చేసుకోవాలో నేర్పించారు.కిలో విత్తనానికి మూడు గ్రాముల కార్బెండజిమ్ 50 శాతం మందును కలిపి 24 గంటల తరువాత నారుమడిలో చల్లుకోవాలని దంప నారుమళ్ళకయితే లీటరు నీటికి ఒక గ్రాము కార్బండెజిమ్ 50 శాతం మందును కలిపి ఆ ద్రావణంలో విత్తనాలను 24 గంటలు నానబెట్టి 24 గంటలు మండెకట్టి మొలకెత్తిన విత్తనాన్ని దంప నారుమడిలో చల్లుకోవాలని సూచించారు.
కిలో విత్తనాలు నానబెట్టడానికి లీటరు మందు నీరు సరిపోతుందని కార్బండెజిమ్ 25 శాతం, మాంకోజెబ్ 50 శాతం మిశ్రమ శిలీంధ్రనాశనిని వాడితే 2 గ్రాముల కిలో విత్తనానికి లీటరు నీటికి చొప్పున వాడుకోవాలని సూచించారు.ఈ కార్యక్రమంలో వ్యవసాయ కళాశాల సహాయ ఆచార్యులు, దత్తత గ్రామ కమిటీ సభ్యులు డా.
సతీష్, డా.సంపత్, రాళ్ళపేట మాజీ సర్పంచ్ పరుశ రాములు, దారం శ్రీనివాసరెడ్డి, సోమ వెంకటేష్, సోమ రాజశేఖర్, రాచర్ల శ్రీకాంత్, సోమ ఎల్లయ్య, సోమ పరశురాములు, సోమ మల్లయ్య, రైతులు తదితరులు పాల్గొన్నారు.
