యాదాద్రి భువనగిరి జిల్లా: పార్లమెంటు ఎన్నికల నేపథ్యంలో కాంగ్రెస్ పార్టీ తన వ్యూహాలకు పదును పెడుతోంది.ఒకవైపు నుంచి బీజేపీ,బీఆర్ఎస్ పార్టీలు ఇప్పటికే ప్రచారాన్ని మొదలుపెట్టగా ఆ రెండు పార్టీల దూకుడుకు కళ్లెం వేసేందుకు హస్తం పార్టీ ప్రత్యేక ప్రణాళికలను రచిస్తోంది.
ఇందులో భాగంగా ఎప్పటికప్పుడు కార్యకర్తలను,నేతలను మేల్కొపుతూ నియోజకవర్గాల వారీగా సీఎం రేవంత్ రెడ్డి వరుస సమీక్షలతో బిజీబిజీగా గడుపుతున్నారు.అయితే, నేడు భువనగిరి పార్లమెంటు నియోజకవర్గ నేతలతో సీఎం రేవంత్ రెడ్డి సమీక్ష నిర్వహించనున్నారు.
ఆ పార్లమెంటు ఇంఛార్జి కోమటిరెడ్డి రాజగోపాల్ రెడ్డి నివాసంలో ఈ సమావేశం జరగనున్నది.ఈ సమీక్ష మీటింగ్కు సీఎం రేవంత్ రెడ్డి హాజరు కానున్నట్లు కాంగ్రెస్ వర్గాలు వెల్లడించాయి.
ఈ సమావేశంలో భువనగిరి లోక్ సభ అభ్యర్థి చామల కిరణ్ కుమార్ రెడ్డి, ఎమ్మెల్యే కుంభం అనిల్ కుమార్ రెడ్డి, ఎమ్మెల్యేలు మందుల సామేలు, వేముల వీరేశం,మల్రెడ్డి రంగారెడ్డి,బీర్ల ఐలయ్య లతో పాటు ముఖ్య నాయకులతో పాటు అసెంబ్లీ నియోజకవర్గాలకు ప్రత్యేకంగా నియమితులైన కో ఆర్డినేటర్లు కూడా హాజరు కానున్నట్లు సమాచారం.
