క్యాలిఫ్లవర్ పంటకు చీడపీడలు ఆశించకుండా ముందస్తు చర్యలు..!

ఈ పంట సాగుకు నల్లరేగడి( Black Soil ), ఎర్ర నేలలు అనువైనవి.వేసవికాలంలో రెండుసార్లు దుక్కి దున్నుకున్న తర్వాత చివరి దుక్కిలో ఎకరాకు పది టన్నుల పశువుల ఎరువుతో పాటు 40 కిలోల పోటాష్, 40 కిలోల భాస్వరం వేసుకొని కలియ దున్నుకోవాలి.ఒక ఎకరంలో సాగుకు 300 గ్రాముల విత్తనాలు అవసరం.

విత్తెముందు ఒక కిలో విత్తనాలకు మూడు గ్రాముల కార్బం డిజమ్ తో విత్తన శుద్ధి చేసుకోవాలి.

నారుమడులను 15 సెంటీమీటర్ల ఎత్తులో ఏర్పాటు చేసుకోవాలి.

అప్పుడే నీరు నిల్వ ఉండకుండా బయటకు వెళ్ళిపోతుంది.విత్తనాలు చల్లిన తర్వాత నారుమడులను వరిగడ్డితో కప్పి ఉంచాలి.నారుదశలో ఏవైనా చీడపీడలు ఆశిస్తే ఒక లీటరు నీటిలో 2.5 మి.లీ మాలాథియాన్ ను కలిపి పిచికారి చేయాలి.

నారు మొక్కలకు 25 రోజుల వయసు వచ్చాక ప్రధాన పొలంలో నాటుకోవాలి.

పొలంలో నీరు నిల్వ ఉండకుండా జాగ్రత్తలు తీసుకొని, వారానికి ఒకసారి నీటి తడిని అందించాలి.ఇక కలుపు నివారణ కోసం మొక్కలు నాటిన 24 గంటల లోపు ఒక ఎకరానికి 1.2 లీటర్ల అలాక్లోర్ ను ఇసుకలో కలుపుకొని తేమగల నేలపై చల్లాలి.పిచికారి చేయకూడదు.

క్యాలీఫ్లవర్ కోత( Cauliflower Farming )కు ఒక వారం ముందు పువ్వును మొక్క యొక్క ఆకులతో కప్పి ఉంచాలి.ఇలా చేస్తే పువ్వు తెల్లగా, మచ్చలు లేకుండా నాణ్యతగా ఉంటుంది.పంటకు వివిధ రకాల చీడపీడలు ఆశించకుండా ఉండాలంటే ముందుగా పొలంలో బోరాన్ లోపం ఉందో లేదో పరీక్షించాలి.పోరాన్ లోపం ఉంటే ఒక లీటరు నీటిలో నాలుగు గ్రాముల బోరాక్స్ ను మొక్కలు నాటిన పది రోజుల తర్వాత, పువ్వు ఏర్పడడానికి 10 రోజుల ముందు మొక్కలు పూర్తిగా తడిచేటట్లు పిచికారి చేస్తే వివిధ రకాల చీడపీడలు పంటను ఆశించే అవకాశం ఉండదు.