టెక్ దిగ్గజం ఎలాన్ మస్క్ తాజాగా ఓ అద్భుతమైన వీడియోను ఎక్స్‌ వేదికగా పంచుకున్నారు.జపాన్ వ్యోమగామి కొయిచి వాకాటా ( Koichi Wakata ) అంతర్జాతీయ అంతరిక్ష కేంద్రం ( ISS )లో బేస్‌బాల్ ఆడుతున్న దృశ్యాలవి.
వాకాటా మొదట ఈ వీడియోను ‘X’లో పోస్ట్ చేయగా, అందులో ఆయన మైక్రోగ్రావిటీలో తేలియాడుతూ అలవోకగా బంతిని విసరడం (పిచ్చింగ్), బ్యాటింగ్ చేయడం, క్యాచ్ పట్టడం మనం చూడొచ్చు.ఈ ఫుటేజ్‌ను ISSలోని జపాన్ ఏరోస్పేస్ ఎక్స్‌ప్లోరేషన్ ఏజెన్సీ (JAXA) మాడ్యూల్‌లో చిత్రీకరించారు.
జపాన్‌లో మేజర్ లీగ్ బేస్‌బాల్ (MLB) సీజన్ ప్రారంభమైన సందర్భంగా, దానికి గుర్తుగా వాకాటా తన బేస్‌బాల్ నైపుణ్యాలను ప్రదర్శించారు.తన పోస్ట్‌లో, “ఎక్స్‌పెడిషన్ 68 సమయంలో, నేను ఒంటరిగా బేస్‌బాల్ ఆడాను.
మైక్రోగ్రావిటీలో అయితే, పెద్ద టీమ్ అవసరం లేదు, పిచ్చర్, బ్యాటర్, ఫీల్డర్ ఇలా అన్ని స్థానాల్లోనూ మనమే ఆడేయొచ్చు” అని రాసుకొచ్చారు.
ఈ వీడియో ఇట్టే మస్క్ చూపును ఆకర్షించింది.ఆయన దీన్ని రీషేర్ చేయడంతో, ఈ క్లిప్ కాస్తా వైరల్‌గా మారింది, కోట్లాది మంది వీక్షకులను సంపాదించుకుంది.ప్రస్తుతం ఈ వీడియో వ్యూస్ సంఖ్య 9.48 కోట్లు దాటిపోయింది.వాకాటా అంతరిక్ష బేస్‌బాల్ నైపుణ్యాలపై సోషల్ మీడియాలో తెగ చర్చ నడుస్తోంది.
వాకాటా ఆటలో అన్ని పాత్రలను తానొక్కడే పోషించడం చూసి అభిమానులు సంబరపడిపోయారు.ఒక యూజర్, “అంతరిక్షంలో మాత్రమే ఒకేసారి పిచ్చర్, బ్యాటర్, ఫీల్డర్ అవ్వగలరు” అని సరదాగా కామెంట్ చేశారు.
మరొకరు, “బేస్‌బాల్ ఆడటానికి ఇంతకంటే కూల్ మార్గం ఉంటుందా బంతి వెంట పరిగెత్తాల్సిన పనే లేదు” అని రాశారు.
చాలామంది వాకాటా సృజనాత్మకతను ప్రశంసించారు.సాధారణ కార్యకలాపాలను కూడా అంతరిక్షంలో అసాధారణ సాహసాలుగా మార్చడంలో ఇదొక అద్భుతమైన మార్గమని కొనియాడారు.భవిష్యత్తులో అంతరిక్షంలో MLB గేమ్ జరిగితే చూడటానికి ఎంతో థ్రిల్లింగ్‌గా ఉంటుందని కొందరు ఊహించుకుంటున్నారు.
వాకాటా విషయానికొస్తే, ఆయన ఓ అనుభవజ్ఞుడైన వ్యోమగామి.JAXAతో దాదాపు రెండు దశాబ్దాల అనుబంధం తర్వాత 2024లో పదవీ విరమణ చేశారు.
తన కెరీర్‌లో, ఆయన ఐదు మిషన్లను పూర్తి చేసి, 500 రోజులకు పైగా అంతరిక్షంలో గడిపారు.అంతేకాదు, ఎక్స్‌పెడిషన్ 39 సమయంలో ISSకు మొదటి జపనీస్ కమాండర్‌గా కూడా ఆయన చరిత్రకెక్కారు.
