న్యూయార్క్‌లో దారుణం .. రైలులో మహిళకు నిప్పు , తగలబడిపోతుంటే ఆనందించిన సైకో

అమెరికా(America) వాణిజ్య రాజధాని న్యూయార్క్‌లో (New York)షాకింగ్ ఘటన చోటు చేసుకుంది.నగరంలోని సబ్ వేలో ఓ మహిళకి ఓ వ్యక్తి నిప్పంటించి.

ఆమె తగలబడుతుంటే కూర్చొని చూసి ఆనందించాడు.ఆదివారం ఉదయం 7.30 గంటలకు బ్రూక్లిన్‌లోని స్టిల్‌వెల్ అవెన్యూ (Stillwell Avenue in Brooklyn)వద్ద లైన్ చివర ఉన్న ఎఫ్ ట్రైన్ వద్ద ఈ ఘటన చోటు చేసుకుంది.రైలు స్టేషన్‌లో ఆగిన తర్వాత.

అనుమానితుడు ప్రశాంతంగా సబ్ వే వద్ద నిద్రపోతున్న బాధితురాలి వద్దకు వెళ్లి, ఆమె దుస్తులకు నిప్పంటించగా క్షణాల్లో మంటలు ఆమె శరీరాన్ని కమ్మేశాయని పోలీసులు వెల్లడించారు.స్టేషన్‌ పై లెవల్‌లో పెట్రోలింగ్ విధుల్లో ఉన్న పోలీస్ , ఇతర అధికారులు మండుతున్న వాసనను గమనించి వెంటనే రంగంలోకి దిగారు.

అప్పటికే బాధితురాలి శరీరం పూర్తిగా కాలిపోయినట్లు అధికారులు తెలిపారు.ఎంటీఏ ఉద్యోగి ఒకరు అగ్నిమాపక యంత్రం సాయంతో మంటలను అదుపు చేసినా అప్పటికే చాలా ఆలస్యం కావడంతో బాధితురాలు ఘటనాస్థలంలోనే ప్రాణాలు కోల్పోయినట్లు పోలీసులు వెల్లడించారు.