విజృంభిస్తున్న డెంగ్యూ.. దీని ప్రధాన లక్షణాలు ఏంటి.. ఈ వైరల్ వ్యాధిని ఎలా గుర్తించాలి?

ప్రస్తుతం వర్షాకాలం కావడంతో డెంగ్యూ( Dengue ) విజృంభిస్తోంది.తెలుగు రాష్ట్రాలతో సహా దేశవ్యాప్తంగా డెంగ్యూ ఫీవర్ బారిన పడుతున్న వారి సంఖ్య అంతకంతకూ పెరుగుతోంది.

డెంగ్యూ అనేది డెంగ్యూ వైరస్ వల్ల కలిగే వైరల్ ఇన్ఫెక్షన్.ఈడిస్ ఈజిప్టి దోమ( Aedes Aegypti Mosquito ) కాటు కారణంగా డెంగ్యూ వ్యాపిస్తుంది.

సకాలంలో డెంగ్యూ వ్యాధిని గుర్తిస్తే చికిత్స ద్వారా వేగంగా బయటపడవచ్చు.లేదంటే ప్లేట్ లెట్స్ భారీగా పడిపోయి ప్రాణాలకే ప్రమాదంగా మారుతుంది.

ఈ నేపథ్యంలోనే డెంగ్యూ ప్రధాన లక్షణాలు( Dengue Symptoms ) ఏంటి.? ఈ వైరల్ వ్యాధిని గుర్తించడం ఎలా.? వంటి విషయాలను ఇప్పుడు తెలుసుకుందాం.డెంగ్యూ సోకిన‌ప్పుడు జ్వరం, తలనొప్పి, వికారం, వాంతులు, కీళ్ళు మరియు కండరాల్లో నొప్పి, ఉబ్బిన గ్రంధులు, కళ్ళ వెనుక నొప్పి, చర్మంపై దద్దుర్లు ప్రధాన లక్షణాలుగా క‌నిపిస్తాయి.

ఒక‌వేళ డెంగ్యూ తీవ్రతరంగా మారినప్పుడు నిరంతర వాంతులు, అలసట, ముక్కు లేదా చిగుళ్ళ నుండి రక్తస్రావం, శ్వాస తీసుకోవడంలో ఇబ్బంది, విపరీతమైన కడుపు నొప్పి, నీరసం, బలహీనత వంటి లక్షణాలు కనిపిస్తాయి.