కెనడా ఫెడరల్ ఎన్నికల్లో భారత సంతతి అభ్యర్ధుల హవా .. ఎంత మంది గెలిచారో తెలుసా?

వృత్తి, ఉద్యోగ, వ్యాపారాల కోసం విదేశాలకు వెళ్లిన భారతీయులు ఆయా దేశాల రాజకీయాల్లో కీలకపాత్ర పోషిస్తున్న సంగతి తెలిసిందే.

చాలా దేశాల్లో ప్రధానులుగా, అధ్యక్షులుగా , మంత్రులుగా, సెనేటర్లుగా, మేయర్లుగా భారతీయులు రాణిస్తున్నారు.

అమెరికాను ఆనుకుని ఉండే కెనడా( Canada ) రాజకీయాల్లోనూ భారతీయులు ఇప్పుడు సత్తా చాటుతున్నారు.భారత సంతతికి చెందిన న్యూ డెమొక్రాటిక్ పార్టీ నేత (ఎన్‌డీపీ) జగ్మీత్ సింగ్( Jagmeet Singh ) నిన్న మొన్నటి వరకు కింగ్ మేకర్‌గా వ్యవహరించారు.

ఏప్రిల్ 28న కెనడాలో ఫెడరల్ ఎన్నికలు( Canada Federal Elections ) జరగ్గా ఈసారి కూడా పెద్ద సంఖ్యలో ప్రవాస భారతీయులు బరిలో నిలిచారు.కన్జర్వేటివ్‌లు, లిబరల్స్‌తో పాటు అన్ని ప్రధాన పార్టీలు భారతీయులకు టికెట్లు కేటాయించాయి.

కొన్ని ఏరియాలలో ప్రత్యర్ధులంతా భారతీయులే కావడం గమనార్హం.ముందస్తు అంచనాలను నిజం చేస్తూ పదుల సంఖ్యలో భారతీయులు కెనడా ఎన్నికల్లో విజయం సాధించారు.

కెనడాలోని భారతీయ కమ్యూనిటీలో ఆధిపత్యం చెలాయిస్తున్న పంజాబీలు రికార్డు స్థాయిలో ఈసారి ఎన్నికయ్యారు.గతంలో ఎన్నడూ లేనివిధంగా ఏకంగా 22 మంది పంజాబీలు హౌస్ ఆఫ్ కామన్స్‌కు ఎన్నికయ్యారు.2021లో 18 మంది, 2019లో 20 మంది పంజాబీలు ఎన్నికయ్యారు.