కేవలం 10 నిమిషాల్లోనే ఐఫోన్ -14 డెలివరీ చేసిన బ్లింకిట్.. సూపర్ ఫాస్ట్ అంటున్న నెటిజన్లు!

నిత్యావసర వస్తువులను ఎలాగైతే క్షణాల్లో వినియోగదారులకు డోర్ డెలివరీ చేస్తారో అదే మాదిరి యాపిల్‌ ఫోన్లను కూడా ఆర్డర్‌ చేసిన నిముషాల వ్యవధిలోనే మీ ముందు ఉంచుతానని బ్లింకిట్‌ ఏ ముహూర్తాన అందోగాని ఆ మాట నిలబెట్టుకొని టాక్ అఫ్ ది టౌన్ అయింది ప్రముఖ డోర్ డెలివరీ సంస్థ బ్లింకిట్.

అవును, యాపిల్‌ కొత్త ఐఫోన్‌ 14ను కూడా కేవలం నిముషాల్లోనే ఇంటికి తెచ్చి అందరినీ ఆశ్చర్యంలో ముంచెత్తింది.

ఈ విషయాన్ని బ్లింకిట్‌ సంస్థ ఫౌండర్‌, CEO అల్బిందర్‌ దిండ్సా ట్విటర్‌ ద్వారా ఈ రోజు స్వయంగా వెల్లడించారు.తాజాగా యాపిల్‌ ఐ ఫోన్లను విక్రయించే యూనికార్న్‌ కంపెనీతో బ్లింకిట్‌ ఒప్పందం కుదుర్చుకున్న సంగతి తెలిసినదే.

దీంతో యాపిల్‌ ఫోన్‌తో సహా యాపిల్‌ వాచ్‌, ల్యాప్‌టాప్స్‌ వంటి ఇతర యాపిల్‌ యాక్సెసరీలను సైతం బ్లింకిట్‌ ద్వారా నిమిషాల్లో వినియోగదారునికి డెలివరీ చేయనున్నట్లు అల్బిందర్‌ దిండ్సా ఈ సందర్భంగా తెలిపారు.మన దేశంలో ప్రస్తుతానికి ఢిల్లీ, ముంబయిలలో ఈ సేవలు అందుబాటులోకి తీసుకొచ్చినట్లు ఈ సందర్భంగా పేర్కొన్నారు.