ప్రజలకు ఇచ్చిన వాగ్దానాలపై ఇంతటి బరితెగింపా?

ఎన్నికల సమయంలో ఇచ్చిన హామీల అమలులో అలసత్వం, నిర్లక్ష్యం, ఎగవేత ధోరణి చూపిస్తున్న కూటమి ప్రభుత్వం అంటూ వైయస్సార్‌సీపీ పార్టీ అధినేత వైఎస్‌ జగన్‌మోహన్‌ రెడ్డి ( YS Jaganmohan Reddy )ధ్వజమెత్తారు.

తాజాగా తల్లికి వందనం చేస్తూ, ఎగవేత కూటమి సర్కార్‌ను నిలదీస్తూ ఆయన తన సోషల్ మీడియా వేదికగా ఆయన సుదీర్ఘ సందేశాన్ని తెలిపారు.

ఇక ఆ సందేశంలో ఏముందంటే.చంద్రబాబు నాయుడు( Chandrababu Naidu ) గారూ… ప్రజలకు ఇచ్చిన వాగ్దానాలపై ఇంతటి బరితెగింపా? మేనిఫెస్టోపై ఇంతటి తేలిక తనమా? ప్రజలకు ఇచ్చిన మాటను అమలు చేయకుండా టేక్‌ ఇట్‌ గ్రాంటెడ్‌గా తీసుకుంటారా? లక్షలమంది తల్లులకు, పిల్లలకు, రైతులకు ఇంతటి ద్రోహం తలపెడతారా? అంటూ పలు ప్రశ్నలను సంధించారు.అధికారంలోకి వస్తే తల్లికి వందనం అని, ఎంతమంది పిల్లలు ఉంటే అంతమందికీ ఏడాదికి రూ.15వేలు చొప్పున ఇస్తామన్నారని అధికారంలోకి రాగానే అంతకుముందు మేం ఇస్తున్న అమ్మ ఒడి పథకాన్ని సైతం ఆపేశారని ఆయన అన్నారు.వరుసగా కేబినెట్‌ సమావేశాలు ( Cabinet meetings )జరుగుతున్నా కానీ, తల్లికి వందనం పథకాన్ని ఎప్పుడు అమలు చేస్తారో నిర్దిష్టంగా చెప్పలేదంటూ తెలిపారు.

చివరికి ఈ ఏడాదికి ఇవ్వమని కేబినెట్ లో తేల్చిచెప్పేశారని, ఇంతకన్నా మోసం ఏమైనా ఉంటుందా? ఇంతకన్నా పచ్చి దగా ఏమైనా ఉంటుందా? అంటూ ప్రశ్నించారు.ఎన్నికల వేళ మీరు, మీ కూటమి నాయకులు రాష్ట్రంలోని ప్రతిచోటా తల్లికి వందనంపై చేసిన ప్రచారం అంతా ఇంతాకాదని, ఇంటింటికీ తిరిగి కనిపించిన ప్రతి పిల్లాడినీ పట్టుకుని నీకు రూ.15వేలు, నీకు రూ.15వేలు, నీకు రూ.15వేలు.అన్నారని తెలిపారు.ఇద్దరుంటే రూ.30వేలు.ముగ్గురు ఉంటే రూ.45వేలు.నలుగురు ఉంటే రూ.60వేలు ఇస్తామన్నారని తెలిపారు.ప్రజలకు మీరుచేసిన వాగ్దానం, మీరు చెప్పిన మాటలు ఆడియో, వీడియోల రూపంలో సాక్ష్యాధారాలుగా ప్రతిఒక్కరి సెల్‌ఫోన్‌లో ఉన్నాయని, వైయస్సార్‌సీపీ హయాంలో( YSRCP ) 44.48 లక్షల మంది తల్లులకు, దాదాపు 84 లక్షల మంది పిల్లలకు, రూ.26,067 కోట్లను మేము అందించి, అత్యంత విజయవంతంగా అమలుచేసిన అమ్మ ఒడిని ఆపేసినా, మీరు ఇస్తామన్న పథకం వస్తుందేమోనని బడికి వెళ్లే ఆ పిల్లలు, వారి తల్లులు ఈ 7-8నెలలుగా ఎదురుచూస్తూనే ఉన్నారని అన్నారు.చివరకు వారి ఆశలపై నీళ్లు జల్లి.

ఈ ఏడాది ఇవ్వమని నిస్సిగ్గుగా చెప్తున్నారన్నారు.ప్రజలకు ఒక మాట ఇచ్చి, దాన్ని నమ్మించి, వారి ద్వారా అధికారాన్ని తీసుకుని, ఇప్పుడు ఇవ్వలేమంటూ ఎలాంటి సంకోచంలేకుండా చెప్తున్నారని, మేనిఫెస్టోను చెత్తబుట్టలో వేసి.

ప్రజలకు ఇచ్చిన వాగ్దానాలను తుంగలో తొక్కడం మీకు అలవాటుగా మారిపోయింది చంద్రబాబు గారూ అంటూ మంది పడ్డారు.