అప్పుడు గుడివాడ.. ఇప్పుడు బెజవాడ ! రేణుకా చౌదరి కన్ఫ్యూజ్ ? 

మాజీ కేంద్రమంత్రి, తెలంగాణ రాజకీయాల్లో కీలక నేతగా ఉన్న కాంగ్రెస్ నేత రేణుక చౌదరి ఏపీ రాజకీయాల్లో అడుగు పెట్టేందుకు ఉత్సాహం చూపిస్తున్నారు.

ముఖ్యంగా అమరావతి ప్రాంత రైతులు, మహిళలు చేపడుతున్న అమరావతి ఉద్యమానికి రేణుక చౌదరి మద్దతు తెలపడమే కాకుండా , ఆందోళన కార్యక్రమాల్లోనూ పాల్గొన్నారు.

ఈ సందర్భంగా ఏపీ మాజీ మంత్రి గుడివాడ వైసీపీ ఎమ్మెల్యే కొడాలి నాని మధ్య విమర్శలు, ప్రతి విమర్శలు జరిగాయి.ఖమ్మంలో రేణుక చౌదరి గెలిచే ప్రసక్తే లేదు అంటూ నాని సెటైర్లు వేయడంతో రేణుక చౌదరి ఆగ్రహం వ్యక్తం చేస్తూ.

రాబోయే ఎన్నికల్లో కాంగ్రెస్ అభ్యర్థిగా గుడివాడ నుంచి పోటీ చేస్తానంటూ సవాల్ చేశారు.అంతేకాదు తెలుగుదేశం పార్టీ మద్దతు కూడా తనకు అవసరం లేదని , గుడివాడలో కొడాలి నానిని ఓడించి తన సత్తా చాటుతానంటూ రేణుక చౌదరి అప్పట్లో సంచలన వ్యాఖ్యలు చేశారు.

ఖమ్మం ఎంపీగా అనేకసార్లు తాను గెలిచానని, కొడాలి నాని వచ్చి ఖమ్మం జిల్లాలోని గల్లీలో తిరిగితే తన సత్తా ఏమిటో తెలుస్తుందంటూ అప్పట్లోనే రేణుక చౌదరి వ్యాఖ్యానించారు.ఈ వ్యవహారం తర్వాత సైలెంట్ గానే ఉన్నారు.

తాజాగా మరోసారి ఏపీ రాజకీయాల వ్యవహారాలపై ఆమె స్పందించారు.ఏపీలో జగన్ పాలన పిచ్చోడి చేతిలో రాయిలా తయారైందని విమర్శించారు.

తమ పార్టీ అధిష్టానం ఆదేశిస్తే,  ఏపీ నుంచి పోటీ చేస్తానని విజయవాడ లోక్ సభ స్థానం నుంచి పోటీ చేయాలనే ఆలోచనలో ఉన్నట్లు రేణుక చౌదరి ప్రకటించారు.