భర్త చనిపోతే ఆ భార్య పడే మనోవేదన మాటల్లో చెప్పలేనిది.భర్తకంటే ముందు తనకెందుకు చావు రాలేదంటూ ఆమె బోరున విలపించే తీరు అందరినీ కలిచివేస్తుంది.
కానీ న్యూఢిల్లీలోని ఓ మహిళ తన భర్త చనిపోయి రెండు రోజులైనా తన కూతురికి కూడా తెలియనివ్వలేదు.ఆమె ఇలా చేయడానికి వెనుక కారణం కూడా ఉంది.
సెంట్రల్ ఢిల్లీలోని కమలా మార్కెట్ ప్రాంతానికి చెందిన జైకుమార్(59) రైల్వేలో సీనియర్ టెక్నీషియన్‌గా పనిచేస్తున్నాడు.అతడి భార్య మీనా(55) రైల్వే స్కూల్‌లో టీచర్‌గా పనిచేస్తోంది.
వారికి తొమ్మిదేళ్ల కూతురు ఉంది.తండ్రి అంటే ఎనలేని ప్రేమ ఉన్న తన కూతురికి తండ్రి రెండు రోజులు క్రితం గుండెపోటుతో మరణించిన వార్తను మీనా తెలియనివ్వలేదు.
అంతేగాక తన తండ్రి బెడ్‌రూంలో విశ్రాంతి తీసుకుంటున్నాడని చెప్పింది.
రెండు రోజులు దాటినా తన తండ్రి బయటకు రాకపోవడంతో కూతురు జైకుమార్‌ను తట్టి లేపబోయింది.
కానీ అతడు ఉలుకుపలుకు లేకుండా ఉండటం, అతడి నోట్లో నుండి రక్తం రావడంతో భయాందోళనకు గురైన ఆ చిన్నారి తన బంధువుకు ఫోన్ చేసి జరిగిందంతా చెప్పింది.దీంతో సదరు బంధువు పోలీసులకు ఫిర్యాదు చేయడంతో వారు అక్కడికి చేరుకున్నారు.
అయితే మీనా వారిని కూడా అడ్డుకుంది.
కానీ ఆమెకు నచ్చజెప్పిన పోలీసులు జైకుమార్ మృతదేహాన్ని పోస్టుమార్టం నిమిత్తం ఆసుపత్రికి తరలించారు.
అటు మీనా మానసిక పరిస్థితిపై వారు అనుమానం వ్యక్తం చేస్తున్నారు.భర్త మృతదేహాన్ని రెండు రోజులుగా ఇంట్లోనే ఉంచుకుని ఎవ్వరికీ ఎందుకు చెప్పలేదనే కోణంలో వారు దర్యాప్తు చేస్తున్నారు.
