తలకిందులుగా దర్శనమిచ్చే ఆలయం ఎక్కడుందో తెలుసా..?

సాధారణంగా మన దేశంలో శివుడిని ఎక్కువగా లింగరూపం లోనే పూజిస్తారు.దాదాపు అన్ని దేవాలయాలలో కూడా శివుడు లింగరూపంలోనే ఉంటాడు.

కానీ శివుడు లింగ రూపంలో కాకుండా విగ్రహ రూపంలో దర్శనమిచ్చే ఒక శివాలయం కూడా ఉంది.అయితే ఆ ఆలయంలో శివుడు తలకిందులుగా తపస్సు చేస్తున్నట్లు భక్తులకు దర్శనం కల్పిస్తాడు.

మరి ఇటువంటి భిన్న రూపంలో ఉన్న శివాలయం ఎక్కడ ఉంది? ఆ విధంగా శివుడు తలకిందులుగా తపస్సు చేస్తున్నట్లు భక్తులకు దర్శనం ఇవ్వడానికి గల కారణాలు ఏమిటో ఇక్కడ తెలుసుకుందాం…

ఆంధ్రప్రదేశ్ లోని పశ్చిమ గోదావరి జిల్లాలో యనమదుర్రు అనే గ్రామంలో ఈ విశేషమైన శక్తీశ్వరాలయం ఉంది.పంచారామ క్షేత్రాలలో ఒకటైన భీమవరం ఐదు కిలోమీటర్ల దూరంలో ఈ శక్తి శ్వరాలయం ఉంది.

ఈ ఆలయంలో శివుడు శీర్షాసనం రూపంలో మనకు దర్శనమిస్తాడు.అంతేకాకుండా పార్వతీదేవి తన ఒడిలో సుబ్రహ్మణ్యేశ్వరస్వామి కూడా ఉన్నట్లు మనకు కనిపిస్తుంది.

అయితే ఈ ఆలయంలో ఎక్కడా చూడనటువంటి శివుడు విగ్రహ రూపంలో తలక్రిందులుగా దర్శనమిస్తూ ఉండటానికి గల కారణం ఉంది.అదేమిటంటే… పూర్వం ఓ రాజ్యంలో శంభురా అనే రాక్షసుడు ఉండేవాడు.అతను పెట్టే చిత్రహింసలను భరించలేక ప్రజలు, మునులు ఈ శంభుర రాక్షసుని కేవలం యమధర్మరాజు మాత్రమే చంపగలరని భావించి యముడి దగ్గరకు వెళ్లి జరిగిన విషయం మొత్తం తెలియజేస్తారు.అయితే ఇంతకుమునుపే శంభరాసురుడుతో పోరాడి ఓడిపోయిన యమధర్మరాజుకు తిరిగి అతనితో పోరాడే శక్తి లేదని ఆ పరమశివునికి తపస్సు చేస్తాడు.

ఆ సమయంలో శివుడు లోక కల్యాణం కోసం తపస్సు చేస్తుంటాడు.యముడు చేస్తున్న తపస్సును చూసిన పార్వతీదేవి ప్రత్యక్షమై శంభురా రాక్షసుణ్ణి చంపడానికి ప్రత్యేక ఆయుధాన్ని యమధర్మరాజు ఇవ్వడంతో ఆ ఆయుధంతో శంబరాసురుని యముడు హతమారుస్తాడు.ఆ విధంగా శంభరాసురుడు మరణించడం వల్ల అక్కడి ప్రజలు ఎంతో విముక్తి పొందుతారు.అప్పటినుంచి ఆ గ్రామాన్ని యమపురి అని పిలిచేవారు.కాలక్రమేణ యమపురి ఇప్పుడు యనమదుర్రుగా మారింది.

శంభరాసురుడు చనిపోయిన తర్వాత కూడా యమపురికి ఎటువంటి ఆపదలు రాకుండా ఉండాలని ఆ పరమశివుని అక్కడే కొలువై ఉండాలని యముడు శివుని ప్రార్థిస్తాడు.

అయితే అప్పటికి కూడా శివుడు తపస్సులో ఉండటం వల్ల అదే రూపంలో శివుడు కుటుంబ సమేతంగా అక్కడ కొలువై ఉన్నాడని పురాణాలు చెబుతున్నాయి.ఈ విధంగా ఈ ఆలయంలో శివుడు తలక్రిందులుగా తపస్సు చేస్తూ భక్తులకు దర్శనం ఇస్తుంటాడు.