అమెరికాలో ఉద్యోగం సంపాదించి జీవితంలో స్థిరపడాలన్నది ఎంతో మంది కల.వీరి ఆశను అవకాశంగా తీసుకుని కొందరు కేటుగాళ్లు వీసా, ఇమ్మిగ్రేషన్ సేవలు అందిస్తామంటూ మోసం చేసిన ఘటనలు కొకొల్లలు.
అలాగే హెచ్ 1 బీ వీసాలు పొందే వారు సైతం ప్రభుత్వానికి తప్పుడు సమాచారం ఇవ్వడం వంటి చర్యలకు పాల్పడుతున్నారు.ఈ నేపథ్యంలో వీసాల జారీలో ఉన్న లోపాలను, మోసాలను అరికట్టేందుకు ట్రంప్ ప్రభుత్వం రంగంలోకి దిగింది.
వీసా విధానాల దుర్వినియోగాన్ని అరికట్టేందుకు అమెరికా పౌరసత్వ, వలసల సేవల విభాగం (యూఎస్సీఐఎస్) పలు చర్యలు తీసుకుంటోంది.ఈ విషయాన్ని ట్రంప్ అధికార యంత్రాంగం అమెరికా చట్టసభ సభ్యులకు తెలిపింది.
ప్రత్యేకించి ఉద్యోగ, ఉపాధి ఆధారిత వీసాల పద్ధతిలో లోపాలు ఉన్నాయని, వీటితో మోసాలకు అవకాశం వుందని యూఎస్సీఐఎస్ అభిప్రాయపడింది.అన్ని అంశాలను పరిగణనలోనికి తీసుకునే హెచ్ 1 బీ వీసాలపై పరిమితుల ఎంపిక ప్రక్రియలో మార్పులు చేపట్టినట్లు వివరించింది.
అమెరికాలో ఉద్యోగులకు, విద్యావంతులకు మేలు జరగాలనే ప్రధాన ఉద్దేశ్యంతోనే, అదే విధంగా అమెరికా కంపెనీలు వారి వ్యాపారాలకు నష్టం జరగకూడదనే ఆలోచనతోనే కొత్త వీసా విధానాలను చేపట్టినట్లు చట్టసభ సభ్యులకు ట్రంప్ అధికార యంత్రాంగం తెలిపింది.హెచ్ 1 బీ వీసాల ప్రక్రియలతో మోసాలు జరుగుతున్న విషయాన్ని గుర్తించామని, వీటి కారణంగా అమెరికా దేశీయంగా పలు విధాలుగా దెబ్బ తింటోందని దీనిని నివారించేందుకు పలు చర్యలు చేపట్టినట్లు వివరించింది.