నైజీరియాలో ఇద్దరు భారతీయులు అపహరణకు గురయ్యారు.స్థానికంగా ఓ ఔషధ కంపెనీలో పనిచేస్తున్న ఇద్దరు భారతీయులు ఆదివారం విధులు ముగించుకొని బయటకు వస్తుండగా.
సాయుధులైన దుండగులు వారిని కిడ్నాప్ చేశారు.నైరుతి నైజీరియాలోని ఓయో రాష్ట్ర రాజధాని ఇబదాన్‌లో ఈ ఘటన చోటుచేసుకుంది.
దీనిపై సమాచారం అందుకున్న పోలీసులు వారి కోసం ముమ్మరంగా గాలిస్తున్నారు.మరోవైపు విదేశీయులను కిడ్నాప్ చేసి భారీగా డబ్బు డిమాండ్‌ చేయడం ఈ మధ్యకాలంలో నిత్యకృత్యమైంది.
డబ్బు అందగానే ఆయా ముఠాలు వారిని వదిలిపెడుతుంటాయి.
భారతీయుల కిడ్నాప్ వ్యవహారంపై నైజీరియా పోలీస్ విభాగం అధికార ప్రతినిధి ఓల్గ్‌బెంగ్ ఫెడేయ్ మాట్లాడుతూ.
అపహరణకు గురైన భారతీయులను రక్షించడానికి తాము తీవ్రంగా ప్రయత్నిస్తున్నామని చెప్పారు.వారు ఎక్కడ ఉన్నారు, ఎవరు కిడ్నాప్ చేశారనేది ఇంకా తెలియరాలేదన్నారు.
కిడ్నాపర్లు తమ డిమాండ్లు పరిష్కరించమంటూ సంప్రదింపులు మొదలుపెట్టారా? లేదా.? అనేది మాత్రం ఆయన వెల్లడించలేదు.మరోవైపు ఈ ఘటన నేపథ్యంలో విదేశీ పౌరులంతా అత్యంత అప్రమత్తంగా ఉండాలని పోలీసులు హెచ్చరించారు.
తమ చుట్టుపక్కల సంచరించే వ్యక్తుల కదలికలు అనుమానాస్పదంగా ఉంటే తక్షణమే పోలీసులను అప్రమత్తం చేయాలని అన్నారు.మరోవైపు వందలాది మంది భారతీయులు ఉపాధి కోసం నైజీరియాకు వలస వెళ్తున్నారు.ముఖ్యంగా ఫార్మాస్యూటికల్స్ పరిశ్రమల్లో ఎక్కువ మంది పనిచేస్తున్నారు.
ఇక, విదేశీయులు, ప్రముఖులను నైజీరియాలోని ముఠాలు లక్ష్యంగా చేసుకుంటున్నాయి.గతంలో కూడా పలువురు భారతీయులను సాయుధ ముఠాలు కిడ్నాప్ చేయగా, భారత ప్రభుత్వం చొరవతో స్థానిక అధికారులు బందీలను క్షేమంగా విడిపించారు.
తెలుగు NRI వార్త విశేషాలు సులభముగా తెలుసుకోండి!!!!
