తెలంగాణ రాష్ర్టం ఏర్పడిన తరువాత మొదటిసారిగా ఉద్యోగాల జాతర మొదలైంది.పదిహేనువేలకు పైగా ప్రభుత్వ ఉద్యోగాల భర్తీకి జివో విడుదలైంది.
దీనికి సంబంధించిన ఫైలుపై ఈమధ్యే ముఖ్యమంత్రి కేసీఆర్ సంతకం చేసిన సంగతి తెలుసు.జిహెచ్ఎంసీ, వ్యవసాయం, సహకార శాఖ, పంచాయతీరాజ్, హోం శాఖ, విద్యుత్తు, పోలీసు, రెవన్యూ….
మొదలైన శాఖల్లో ఇక పోస్టులు భర్తీ చేయబోతున్నారు.ఈ పోస్టుల్లో కొన్నింటిని తెలంగాణ పబ్లిక్ సర్వీస్ కమిషన్ భర్తీ చేస్తే, మిగిలినవాటిని ఆయా శాఖలు భర్తీ చేస్తాయి.
ఈ ఉద్యోగాల కోసం వయో పరిమితిని పదేళ్ల పాటు సడలించి ముఖ్యమంత్రి కేసీఆర్ పెద్ద మనసు చాటుకున్నారు.మొత్తం పదిహేనువేల ఐదొందల ఇరవైరెండు మందికి ఉద్యోగాలు దొరకబోతున్నాయి.
సంతోషం.అయితే లక్ష మందికి ఉద్యోగాలు ఇస్తానని కేసీఆర్ చేసిన వాగ్దానం ముందు ఈ ఉద్యోగాలు చాలా తక్కువ.
సుమారుగా ఇంకా ఎనభైఐదు వేల ఉద్యోగాలు భర్తీ చేయాలి.అవెప్పుడు చేస్తారో తెలియదు.
ఈ ఉద్యోగాలు భర్తీ చేయడానికి ఏడాది సమయం తీసుకున్నారు.మరి ఎనభైఐదు వేల ఉద్యోగాలు భర్తీ చేయడానికి ఎన్నేళ్లు తీసుకుంటారు? ఏడాదికి పదిహేను వేల ఉద్యోగాలు భర్తీ చేసినా ఆయన దిగిపోయేలోపల పదిహేనువేలే అవుతాయి.అసలు ఏడాదికి పదిహేనువేల ఉద్యోగాలు భర్తీ చేయడం సాధ్యమా? ఒకవిధంగా చెప్పాలంటే ఇది కంటితుడుపే.కాని రేపు ప్రచారం మాత్రం భారీగా చేసుకుంటారు.
గోరంతను కొండంత చేయడం రాజకీయ నాయకులకు అలవాటే కదా….!
.