మోతె ఎంపీడీవో ఆఫీస్ లో ఇద్దరు అధికారుల ఇష్టారాజ్యం
సూర్యాపేట జిల్లా: మోతె మండల ఎంపీడీవో ఆఫీస్ లో చాలా కాలంగా తిష్ట వేసిన సూపరిండెంట్, సీనియర్ అసిస్టెంట్ ఎంపీడీఓను కూడా లెక్కచేయకుండా,సమయపాలన పాటించకుండా ఉదయం 11 గంటలకు డ్యూటీకొచ్చి సాయంత్రం 4 గంటలకే వెళుతూ,ఇష్టారాజ్యంగా సెలవులు పెడుతూ విధులు నిర్వహిస్తున్నా పట్టించుకునే నాథుడే కరువయ్యాడని మండల ప్రజలు ఆరోపిస్తున్నారు.
రోజు మాదిరిగానే సోమవారం కూడా సాయంత్రం 4 గంటలకే వెళ్ళి ఖాళీ కుర్చీలు దర్శనమివ్వడంతో ఇదే విషయమై ఎంపీడీవోను వివరణ కోరగా నాకు తెలియదని, వారు వెళుతున్నట్లు నాకు ఎలాంటి సమాచారం లేదని,నేను వారికి ఎలాంటి అనుమతి ఇవ్వలేదని చెప్పడం గమనార్హం.
అయితే ప్రస్తుత సూపరిండెంట్ గతంలో ఈ కార్యాలయంలో ఇంచార్జి ఎంపీడీఓగా బాధ్యతలు నిర్వహించినట్లు తెలుస్తోంది.
ఆ ధైర్యంతోనే ఇప్పుడున్న ఎంపీడీవో ఆదేశాలు బేఖాతర్ చేస్తూ ఇష్టానుసారంగా విధులు నిర్వహిస్తున్నట్లు ఆఫిస్ లో గుసగుసలు వినిపిస్తున్నాయి.
విధుల పట్ల నిర్లక్ష్యంగా వ్యవహరిస్తున్న అధికారులపై ఉన్నతాధికారులు స్పందించి తక్షణమే చర్యలు తీసుకోవాలని మండల ప్రజలు కోరుతున్నారు.
