ఒక డబ్బున్న కుర్రాడు ఒక ఊరు తల రాతని పూర్తిగా మార్చేసిన కథ తో తెలుగు సినిమా రికార్డులు తిరగరాసిన మహేష్ బాబు – తన శ్రీమంతుడు తో ఫామిలీ జనాల ఫాలోయింగ్ ని కూడా విపరీతంగా పెంచేసుకున్నాడు.ఈ సినిమా గత సంవత్సరం ఆగస్ట్ ఏడు న విడుదల అయ్యి బ్లాక్ బస్టర్ గా నిలిచిన సంగతి తెలిసిందే.
మహేష్ బాబు కి కెరీర్ లో అతి పెద్ద కలక్షన్ లు తెచ్చిపెట్టడమే కాక ఆయనకంటూ అద్భుతమైన గుర్తింపుని ఇచ్చింది ఈ చిత్రం.విడుదల అయిన అన్ని చోట్లా ఈ సినిమా సందడి చేసింది అయితే ఆశ్చర్యకర విషయం ఏంటంటే రెండవ సారి విడుదల లో కూడా ఈ సినిమా సూపర్ హిట్ గా నిలిచింది.
శివరాత్రి పర్వదినం సందర్భంగా తెలుగు రాష్ట్రాల్లో జాగరణ చేసే వారికోసం పాత సినిమాలను అర్థరాత్రి షోలుగా వేసే సాంప్రదాయం చాలాకాలంగా కొనసాగుతూ వస్తోన్న విషయం తెలిసిందే.‘శ్రీమంతుడు’ సినిమాకు ఈ శివరాత్రికి రెండు తెలుగు రాష్ట్రాల్లో మంచి ఆదరణ కనిపించింది.
ముఖ్యంగా హైద్రాబాద్లో శివరాత్రి రోజున మొత్తం 27 షోలు ప్రదర్శితమైతే ఈ షోల ద్వారా మొత్తం 21 లక్షల రూపాయల వసూళ్ళు రావడం విశేషంగా చెప్పుకోవచ్చు.రెండు తెలుగు రాష్ట్రాల్లోనూ శ్రీమంతుడు సినిమాకు మంచి డిమాండ్ కనిపించిందని చిత్ర వర్గాలు తెలిపాయి.