రాఘవ లారెన్స్‌ దర్శకత్వం వహించి హీరోగా నటించిన ‘కాంచన`2’(తెలుగులో గంగ) సినిమాకు తమిళ ప్రేక్షకులు బ్రహ్మరథం పడుతున్నారు.రెండు వారాల ముందు విడుదల అయిన ఈ సినిమాకు తమిళనాడుతో పాటు కేరళలో కూడా మంచి ఆధరణ లభిస్తోంది.
కేవలం రెండు వారాల్లోనే ఈ సినిమా 50 కోట్ల మార్క్‌ను దాటినట్లుగా తమిళ ట్రేడ్‌ వర్గాల ద్వారా తెలుస్తోంది.ఇప్పటికి కూడా ఈ సినిమాకు మంచి వసూళ్లు వస్తున్నాయి.
ఇంతటి స్థాయి కలెక్షన్స్‌ను దర్శకుడు రాఘవలారెన్స్‌తో పాటు చిత్ర యూనిట్‌ సభ్యుల్లో ఏ ఒక్కరు కూడా ఊహించలేదు.ఈ విజయానికి దర్శకుడు లారెన్స్‌తో పాటు నిర్మాత సంతోషంతో పొంగిపోతున్నారు.
తమిళనాట ఈ సంవత్సరం విడుదలైన సినిమాల్లో టాప్‌ 5వ స్థానంలో ‘కాంచన`2’ నిలిచినట్లుగా తమిళ సినీ ట్రేడ్‌ వర్గాల వారు చెబుతున్నారు.రాఘవ లారెన్స్‌ హీరోగా నటించిన ఈ సినిమాలో హీరోయిన్‌గా తాప్సి నటించగా, ముఖ్య పాత్రలో నిత్యామీనన్‌ నటించింది.
ఇక ఈ సినిమాను తెలుగులో ‘గంగ’గా విడుదల చేశారు.ఆర్థిక ఇబ్బందుల వల్ల వారం లేట్‌గా విడుదల అయిన ఈ సినిమా టాలీవుడ్‌ బాక్సాఫీస్‌ వద్ద కూడా మంచి వసూళ్లను సాధిస్తోంది.
మొదటి వారం రోజుల్లోనే ఈ సినిమా 15 కోట్లు వసూళ్లు చేసినట్లుగా విశ్వసనీయ సమాచారం ద్వారా తెలుస్తోంది.మొత్తానికి తమిళనాడుతో పాటు తెలుగు రాష్ట్రాల్లో కూడా ఈ సినిమా కలెక్షన్స్‌ చిత్ర యూనిట్‌ సభ్యులకే షాక్ ఇస్తున్నాయి.
