యంగ్ హీరో నాగ శౌర్య ఇటీవల అశ్వద్ధామ చిత్రంతో ప్రేక్షకులను అలరించిన సంగతి తెలిసిందే.ఆ సినిమా కమర్షియల్ పరంగా సక్సెస్ కాకపోవడంతో తన నెక్ట్స్ చిత్రాలను పక్కా ప్లాన్‌తో తెరకెక్కించేందుకు రెడీ అవుతున్నాడు ఈ హీరో.
కాగా తాజాగా కిరణ్ కొర్రపాటి అనే కొత్త దర్శకుడితో ఓ సినిమా చేసేందుకు రెడీ అవుతున్న నాగ శౌర్య, త్వరలోనే ఈ సినిమా షూటింగ్‌ను ప్రారంభించాలని చూస్తున్నాడు.కాగా తాజాగా ఈ సినిమాకు సంబంధించిన ప్రీలుక్ పోస్టర్‌ను చిత్ర యూనిట్ రిలీజ్ చేశారు.
ఈ ప్రీలుక్ పోస్టర్‌లో అదిరిపోయే బాడీ ఫిజిక్‌తో నాగశౌర్య దుమ్ములేపాడు.స్పోర్ట్స్ బ్యాక్‌డ్రాప్‌తో తెరకెక్కుతున్న ఈ సినిమాలో నాగశౌర్య ఆర్చరీ ఆటగాడిగా కనిపిస్తాడట.తనకు ఎదురైన సమస్యలను అతడు ఎలా అధిగమించి, తాను గురిపెట్టిన విజయాన్ని ఎలా అందుకున్నాడనేది సినిమా కథ అని తెలుస్తోంది.ఈ సినిమా కోసం కండలు తిరిగేలా బాడీని పెంచాడు ఈ హీరో.
లాక్‌డౌన్ సమయం బాగా కలిసిరావడంతో ఈ హీరో తెగ వర్కవుట్స్ చేశాడు.ఇక ఈ సినిమాలో కూడా మనోడు పూర్తి గడ్డంతో ఉండబోతున్నట్లు తెలుస్తోంది.
ఇక ఈ సినిమాను నార్త్‌స్టార్ ఎంటర్‌టైన్‌మెంట్స్‌తో పాటు శ్రీ వెంకటేశ్వర సినిమాస్ బ్యానర్లు సంయుక్తంగా ప్రొడ్యూస్ చేస్తున్నాయి.కాగా ఈ సినిమాలో అందాల భామ కేతిక శర్మ హీరోయిన్‌గా నటించనుంది.
ఈ సినిమా షూటింగ్‌ను వీలైనంత త్వరగా ప్రారంభించి సినిమాను అతి త్వరలో ముగించేయాలని చూస్తున్నారు.ఈ సినిమాతో నాగశౌర్య ఎలాంటి హిట్ అందుకుంటాడో చూడాలి.ఇక ఈ సినిమా ఫస్ట్ లుక్ పోస్టర్‌ను జూలై 27న రిలీజ్ చేస్తున్నట్లు చిత్ర యూనిట్ ప్రకటించింది.
