వస్తువు కొనడం కాదు, దాన్ని కాపాడుకోవడం గొప్ప అని చెబుతుంటారు పెద్దలు.కొనడం ఎందుకు గొప్ప కాదు అనే వాదన ఎందుకు కాని, కాపాడుకోవడం మాత్రం నిజంగా గొప్ప విషయమే.
ఎందుకంటే ఆ వస్తువు పట్ల పూర్తి అవగాహన ఉంటే తప్ప దాన్ని కాపాడుకోలేం.ఇప్పుడు స్మార్ట్ ఫోన్లు చేతిలో ఉండటం చాలా సాధారణ విషయమే.
కాని దాన్ని కొన్ని ప్రమాదాల నుంచి కాపాడుకోవడం కూడా నేర్చుకోవాలి.మీ ఫోన్స్ సెక్యూర్డ్ గా ఉండాలంటే ఈ తప్పులు మాత్రం చేయొద్దు.
* 90% ఫోన్లలో ప్రీ ఇంస్టాల్డ్ అంటివైరస్ ఉండదు.కాబట్టి ఫోన్ కొన్న వెంటనే మర్చిపోకుండా ఆంటివైరస్ ఇంస్టాల్ చేయాలి.
యాంటి వైరస్ లేకపోతే తాళం వేయని ఇంటిలో నిద్రపోతున్నట్లే.ఎప్పుడు ఏ వైరస్ అటాక్ చేస్తుందో చెప్పలేం.
* స్టోర్ నుంచి కాకుండా బయట నుంచి ఏపికే ఫైల్స్ డవున్లోడ్ చేస్తే ఇంస్టాల్ చేసేముందు ఒకటికి రెండుసార్లు ఆలోచించండి.ఈ యాప్ ఏ కంపెని చేసింది? ఆ కంపెనీ పుట్టుపూర్వోత్తరాలు ఏంటి అని తెలుసుకోని, నమ్మదగిన కంపెనీ అయితేనే ఇంస్టాల్ చేయండి.
* పబ్లిక్ వైఫై నెట్వర్క్స్ కి మీ ఫోన్ ని కనెక్ట్ చేయకపోవటమే మంచిది.హ్యాకింగ్ చేయాలనుకునే వారు ఎక్కువగా ఈ పబ్లిక్ నెట్వర్క్స్ తో బురిడి కొట్టించాలని ప్రయత్నిస్తుంటారు.
* యాప్స్ కాని, సిస్టమ్ అపడేట్స్ కాని వస్తే పట్టించుకోకుండా వదిలేయకండి.కిందటి వెర్షన్ లో ఉన్న ఎర్రర్స్ తీసేసే కొత్త అప్డేట్స్ ఇస్తుంటారు.
* అవసరం ఉంటే తప్ప బ్లూటూత్ ఆన్ చేయొద్దు.హ్యాకర్స్ బ్లూటూత్ ఆన్ లో ఉన్న ఫోన్ జాడ ఈజీగా పట్టేస్తారు.
* పె పల్, ఈబే, అమెజాన్, ఫ్లిప్ కార్ట్ .ఇలాంటి యాప్స్ లేదా సైట్స్ లో మీ డెబిట్ , క్రెడిట్ కార్డ్స్ సేవ్ చేసుకుంటే చేసుకున్నారు కాని, పని పూర్తయ్యాక లాగౌట్ చేయడం మర్చిపోకండి.
* ఇక అతిముఖ్యమైనది .ఏ లింక్ పడితే ఆ లింక్ మీద క్లిక్ చేయకండి.కోటి రూపాయలు వచ్చాయి, పదివేల ఫోను వేయి రూపాయలకే లాంటి బంపర్ ఆఫర్లు మీకు ఊరికే ఎవరు ఇవ్వరు.