అమెరికాలోని మిచిగాన్ రాష్ట్ర గవర్నర్ సంచలన నిర్ణయం తీసుకున్నారు.రాష్ట్రంలో ఫ్లేవర్డ్ ఈ-సిగరెట్లను నిషేధిస్తున్నట్లుగా ప్రకటించారు.
తద్వారా అమెరికా సంయుక్త రాష్ట్రాల్లో ఈ నిషేధాన్ని విధించిన తొలి రాష్ట్రంగా మిచిగాన్ నిలిచింది.గవర్నర్ ఆదేశాల మేరకు ఎలక్ట్రానిక్ నికోటిన్ డెలివరీ సిస్టం, మార్కెటింగ్ను నిషేధిస్తున్నట్లు మిచిగాన్ హెల్త్ డిపార్ట్మెంట్ ఉత్తర్వులు జారీ చేసింది.
అంతకు ముందు ఈ సిగరెట్ల వాడకం, నిషేధంపై గవర్నర్ ఒక ప్రకటన విడుదల చేశారు.రాష్ట్రంలో తమ తొలి ప్రాధాన్యత చిన్నారుల క్షేమమేనని తెలిపారు.అలాగే ఈ-సిగరెట్లను తయారు చేసే కంపెనీలు కాండీ ఫ్లేవర్తో ఉండే ఉత్పత్తులను తక్షణం నిలిపివేయాలని కోరారు.
ఫెడరల్ ప్రభుత్వం మైనర్లకు ఈ-సిగరెట్ల అమ్మకాన్ని అడ్డుకోవడానికి ఎంతగానో ప్రయత్నించింది.
అయితే ఇది అనుకున్న స్థాయిలో విజయవంతం కాలేదు.తాజాగా మిచిగాన్ నికోటిన్ ఉత్పత్తులను నిషేధించడంతో మరికొన్ని రాష్ట్రాలు ఇదే దారిలో నడుస్తాయని గవర్నర్ విట్మెర్ ఆశాభావం వ్యక్తం చేశారు.
కాగా ఈ- సిగరెట్ బ్యాటరీతో పనిచేస్తుంది.నికోటిన్తో ఉండే ద్రవ పదార్థాన్ని మండిచడం ద్వారా వెలువడే ఆవిరి ఒక రకమైన అనుభూతిని కలిగిస్తుంది.పెన్ను రీఫిల్ మార్చినట్లుగా దీనిని ఎన్నిసార్లయినా మార్చుకోవచ్చు.ఈ-సిగరెట్లలో ఉండే నికోటిన్ మెదడుపై ప్రభావం చూపుతుంది.సాధారణ సిగరెట్లను మానేయడానికి ఈ-సిగరెట్లు ఉపయోగపడుతాయన్న ప్రచారాన్ని కంపెనీలు ప్రచారం చేస్తుండటంతో మరింత మంది వీటికి బానిసలవుతున్నట్లు గణాంకాలు చెబుతున్నాయి.