రాజకీయాలంటే మామూలు విషయం కాదు కాదా… ఇక్కడ గెలవాలంటే ప్రజల మద్ధతుతో పాటు డబ్బు కూడా కావాల్సిందే.అమెరికా నుంచి అనకాపల్లిలోని గల్లి రాజకీయాల వరకు కాసులదే కీలకపాత్ర.
ఇక ఈ సంగతి పక్కనబెడితే.అమెరికాలో ప్రస్తుతం అధ్యక్ష ఎన్నికలు జరుగుతున్న సంగతి తెలిసిందే.
అధికారాన్ని నిలబెట్టుకోవడానికి రిపబ్లికన్లు.ఎలాగైనా ఒడిసిపట్టాలని డెమొక్రాట్లు పావులు కదుపుతున్నారు.
ఇదే సమయంలో అధ్యక్ష ఎన్నికల్లో పోటిపడుతున్న బిలియనీర్, మాజీ న్యూయార్క్ మేయర్ మైఖేల్ బ్లూమ్బర్గ్ కోట్లు కుమ్మరిస్తున్నారు.డెమొక్రాటిక్ పార్టీ నుంచి బరిలో నిలిచిన ఆయన వివిధ టీవీ ఛానెల్స్లో ప్రకటనల కోసం గత నెల నుంచి ఇప్పటి వరకు సుమారు 120 మిలియన్ డాలర్లు ఖర్చు పెట్టారు.50 రాష్ట్రాలపైనా బ్లూమ్బర్గ్ ఖర్చు పెడుతున్నప్పటికీ.ఎక్కువగా కాలిఫోర్నియా, టెక్సాస్, ఫ్లోరిడా వంటి కీలక రాష్ట్రాలకు ఎక్కువ ప్రాధాన్యతనిస్తున్నారు.
నవంబర్ చివరి నుంచి సుమారు మూడు వారాల్లో మాజీ మేయర్ ప్రకటనల కోసం చేసిన ఖర్చు… ఈ ఏడాది మొత్తం డెమొక్రాటిక్ అభ్యర్థులు చేసిన ఖర్చు కంటే రెట్టింపని పొలిటికో నివేదిక తెలిపింది.అధ్యక్ష రేసులో ఇంతటి వ్యయాన్ని తాము గతంలో ఎప్పుడూ చూడలేదని రిపబ్లికన్ రాజకీయ వ్యూహకర్త జిమ్ మెక్లాఫ్లిన్ వ్యాఖ్యానించారు.కాగా గతవారం క్విన్నిపియాక్ యూనివర్సిటీ విడుదల చేసిన సర్వే ప్రకారం డెమొక్రాటిక్ ప్రాథమిక రేసులో మాజీ ఉపాధ్యక్షుడు జో బిడెన్ 30 శాతం ఓట్లతో అందరికంటే ముందున్నారు.ఆయన తర్వాత 17 శాతం ఓట్లతో సెనేటర్ ఎలిజబెత్ వారన్, బ్లూమ్బర్గ్ 7 శాతం ఓట్లతో ఐదో స్థానంలో ఉన్నారు.