ఈ మధ్యకాలంలో మామూలుగా ఏ విషయాన్ని చేసిన అందరికీ తెలిసేలా చేయాలని చాలా మంది భావిస్తుంటారు.అందుకోసం మామూలు విషయాన్ని కూడా పెద్ద ఎత్తున జరిగినట్లుగా బిల్డప్ ఇవ్వడానికి నానా తంటాలు పడుతుంటారు కొందరు.
ఇలాంటిదే తాజాగా ఓ వ్యక్తి అహంకారమో, లేకపోతే ఇంకా ఏదైనా తెలివిలేని తనమో అర్థం కాలేదు కానీ అతిగా ప్రవర్తించి చివరికి జైలు పాలయ్యాడు.ఓ వ్యక్తి తాజాగా తన పుట్టినరోజు సందర్భంగా కేక్ కట్ చేసి జైలు పాలయ్యాడు.
తన పుట్టిన రోజునాడు కేక్ కట్ చేస్తే జైలుకు వెళ్లడం ఏంటి అనే కదా మీ ప్రశ్న.అవును ఇందుకు సంబంధించి పూర్తి వివరాల్లోకి వెళితే.
మహారాష్ట్రలోని నాగపూర్ కు చెందిన 19 సంవత్సరాలు ఉన్న నిఖిల్ పటేల్ అనే వ్యక్తి తాజాగా తన పుట్టినరోజు సందర్భంగా తన స్నేహితులందరినీ పిలిచి ఘనంగా వేడుకలను చేసుకున్నాడు.ఇలా పార్టీకి వచ్చిన నిఖిల్ స్నేహితులు మొత్తం నాలుగు పెద్ద కేకులను ఆర్డర్ చేయించారు.
మామూలుగా మనం కేక్ లను ఏవిధంగా కట్ చేస్తాం.? మామూలుగా అయితే చిన్నపాటి కత్తి తీసుకుని కట్ చేస్తాం.కానీ, నిఖిల్ మాత్రం కాస్త ఎక్కువగా ఆలోచించి కటకటాల పాలయ్యాడు.
తన పుట్టినరోజును ఘనంగా నిర్వహించుకోవాలని తాను కేక్ ను కత్తితో కట్ చేస్తే కొత్త ఏముంటుంది అని చెప్పి ఇంట్లోని ఓ పెద్ద తల్వార్ కత్తిని తీసుకోచ్చి కేకును కట్ చేశాడు.
ఈ తతంగం మొత్తం అతని స్నేహితులు ఫోటోలు, వీడియోలు తీసి మొదటగా వాట్సప్ లో షేర్ చేసుకున్నారు.ఆ తర్వాత ఆ ఫోటోలు సోషల్ మీడియాలో ప్రత్యక్షమయ్యాయి.
ఈ ఫోటోలు తాజాగా పోలీసుల కంట పడ్డాయి.ఇంకేముంది మారణాయుధాలు వాడకం చట్టం కింద పోలీసులు అతన్ని అరెస్టు చేసి జైలుకు పంపారు.
