గత కొన్ని నెలలుగా సినీ తారల ఆకస్మిక మరణాలతో భారత్తో పాటు ప్రపంచవ్యాప్తంగా సినీ అభిమానులు విషాదంలో మునిగిపోయారు.ఈ క్రమంలో కుమారుడితో కలిసి నది విహారానికి వెళ్లిన అమెరికన్ నటి నయా రివీరా కథ విషాదాంతం అయ్యింది.
బుధవారం మధ్యాహ్నం ఒంటి గంట సమయంలో రివీరా ఓ బోటును అద్దెకు తీసుకుని తన నాలుగేళ్ల కుమారుడితో కలిసి కాలిఫోర్నియాలోని పెరూ లేక్లో షికారుకు వెళ్లింది.
సాయంత్రం అవుతున్నా రివీరా తిరిగి రాకపోవడంతో బోటు యాజమాని పోలీసులకు ఫిర్యాదు చేశారు.
దీంతో రంగంలోకి దిగిన సహాయక బృందం ఆ రోజు రాత్రే బోటును గుర్తించారు.అయితే రివీరా కుమారుడు మాత్రమే ఉండటంతో సిబ్బంది ఆందోళన పడ్డారు.ఆ పిల్లాడి పక్కనే ఓ లైఫ్ జాకెట్, రివీరా హ్యాండ్ బ్యాగ్ పడివున్నాయి.
దీంతో ఆమె కోసం సహాయక బృందాలు హెలికాఫ్టర్లు, డ్రోన్ల సాయంతో రెస్క్యూ ఆపరేషన్ నిర్వహించారు.
గత ఐదు రోజులుగా నిర్వహిస్తున్న గాలింపు చర్యల్లో భాగంగా మంగళవారం ఉదయం రివీరా మృతదేహం లభ్యమైంది.దీంతో హాలీవుడ్ ప్రముఖులు, ఆమె అభిమానులకు తీవ్ర దిగ్భ్రాంతి వ్యక్తం చేశారు.
ఫాక్స్ మ్యూజికల్ కామెడీ చిత్రం ‘‘గ్లీ’’ ద్వారా రివీరా మంచి గుర్తింపు తెచ్చుకుంది.