బాలయ్య ఎవరిని వదలడం లేదుగా..!       2018-05-21   21:52:13  IST  Raghu V

నందమూరి బాలకృష్ణ సక్సెస్‌ కోసం అర్రులు చాచుకుని ఎదురు చూస్తున్నాడు. ఎప్పుడో ఒకటి అర సక్సెస్‌లు దక్కించుకుంటున్న నందమూరి బాలకృష్ణ గత సంవత్సరం ‘గౌతమిపుత్ర శాతకర్ణి’ చిత్రంతో విజయాన్ని సొంతం చేసుకున్నాడు. ఆ తర్వాత వచ్చిన పైసా వసూళ్‌ మరియు జైసింహా చిత్రాలు అట్టర్‌ ఫ్లాప్‌ అయ్యాయి. ఆ రెండు సినిమాల ఫలితాలతో బాలయ్యలో కసి పెరిగినట్లుగా ఉంది. అందుకే ఆయన ఈసారి ఎలాగైనా సక్సెస్‌ కొట్టాలనే పట్టుదలతో ఉన్నాడు. అందుకోసం తనకు గతంలో సక్సెస్‌లు ఇచ్చిన దర్శకులందరిని పట్టుకుంటున్నాడు. వినాయక్‌, క్రిష్‌, బోయపాటి ఇలా ముగ్గురు దర్శకులతో ఈయన గతంలో సినిమాలు చేసి సక్సెస్‌లు దక్కించుకున్నాడు.

ఇప్పుడు మరోసారి వీరి దర్శకత్వంలో సినిమాలు చేసేందుకు ఆసక్తిగా ఉన్నాడు. ఇప్పటికే వినాయక్‌ దర్శకత్వంలో సి కళ్యాణ్‌ బ్యానర్‌లో ఒక సినిమా పట్టాలెక్కబోతుంది. అందుకు సంబంధించిన స్క్రిప్ట్‌ వర్క్‌ పూర్తి అయ్యింది. జూన్‌ మొదటి లేదా రెండవ వారంలో సినిమాకు సంబంధించిన కీలక ప్రకటన వెలువడే అవకాశాలున్నాయి. ఇప్పటికే ఆ సినిమాలో శ్రియను హీరోయిన్‌గా ఎంపిక చేయడం జరిగింది. మరో వైపు బాలకృష్ణ తన తండ్రి ఎన్టీఆర్‌ బయోపిక్‌ను కూడా తెరకెక్కించేందుకు సన్నాహాలు చేస్తున్నాడు. ఆ సినిమాకు సంబంధించిన స్క్రిప్ట్‌ వర్క్‌ జరుగుతుంది.

ఎన్టీఆర్‌ బయోపిక్‌కు క్రిష్‌తో దర్శకత్వం చేయించేందుకు బాలయ్య విశ్వ ప్రయత్నాలు చేస్తున్నాడు. అడిగినంత పారితోషికం ఇవ్వడంతో పాటు, ఆయన కావాల్సిన సమయంలో సినిమాను టేకోవర్‌ చేసే అవకాశంను కూడా ఇవ్వడం జరిగింది. ప్రస్తుతం మణికర్ణిక చిత్రాన్ని చేస్తున్న క్రిష్‌ ఆ తర్వాత బాలయ్య ‘ఎన్టీఆర్‌’ చిత్రాన్ని చేసే అవకాశం ఉంది. ఈ రెండు సినిమాల గురించి జోరుగా చర్చలు జరుగుతున్న సమయంలోనే బాలయ్య మరో సినిమాకు కూడా చర్చలు జరుపుతున్నట్లుగా తెలుస్తోంది.

నందమూరి బాలకృష్ణకు గతంలో ‘సింహా’, ‘లెజెండ్‌’ వంటి బ్లాక్‌ బస్టర్‌ సక్సెస్‌లను ఇచ్చిన బోయపాటి ప్రస్తుతం రామ్‌ చరణ్‌తో ఒక చిత్రాన్ని చేస్తున్నాడు. ఆ సినిమా పూర్తి అవ్వడమే ఆలస్యం ఆయనతో సినిమా చేయాలని బాలయ్య కోరుకుంటున్నాడు. అందుకు సంబంధించిన చర్చలు జరుగుతున్నాయి. చాలా రోజులుగా బాలయ్య, బోయపాటి మూవీ వాయిదా పడుతూ వస్తుంది. ఎట్టకేలకు అది ఇప్పుడు వర్కౌట్‌ అయ్యే సూచనలు కనిపిస్తున్నాయి. అయితే మొదట వినాయక్‌ద ర్శకత్వంలో మూవీని చేయబోతున్న బాలయ్య ఆ తర్వాత ఎన్టీఆర్‌ చిత్రాన్ని చేస్తాడా లేదంటే బోయపాటి మూవీని చేస్తాడా అనేది తెలియాల్సి ఉంది. మొత్తానికి బాలయ్య ఏ ఒక్క దర్శకుడిని కూడా వదలకుండా సక్సెస్‌ కోసం విశ్వ ప్రయత్నాలు చేస్తున్నాడు. మరి ఈ ప్రయత్నాలు ఎంత వరకు సఫలం అవుతాయో చూడాలి.