అమెరికాలో భారతీయ హోటల్ యజమానుల పెద్ద మనుసు: భారతీయులకు ఉచిత వసతి, భోజనం

కరోనా కారణంగా అక్కడ చదువుకుంటున్న వేలాది మంది విద్యార్ధులను హాస్టళ్ల యజమానులు ఖాళీ చేయాల్సిందిగా బలవంతం చేస్తున్నారు.మార్చి 22 నుంచి అంతర్జాతీయ సర్వీసులు నిలిచిపోవడం, ఎక్కడ ఉండటానికి వీలు లేకపోవడంతో భారతీయులు నరకం అనుభవిస్తున్నారు.దీంతో వీరిని ఆదుకునేందుకు సుమారు 700 హోటళ్లు 6,000కి పైగా గదుల్లో బసను ఏర్పాటు చేసినట్లు బుధవారం అమెరికాలోని భారత రాయబార కార్యాలయం ప్రకటించింది.
అధికారిక లెక్కల ప్రకారం అమెరికాలో 2,50,000 మంది భారతీయ విద్యార్ధులు చదువుకుంటున్నారు.వీరందరి యోగక్షేమాల కోసం గత వారం నుంచి ఇండియన్ ఎంబసీ అధికారులు రౌండ్ ది క్లాక్ హెల్ప్‌లైన్ నడుపుతున్నారు.

అమెరికా సంయుక్త రాష్ట్రాలలోని వివిధ యూనివర్సిటీలు, కళాశాలల సమీపంలో ఎన్నో భారతీయ హోటళ్లు ఉన్నాయి.ఈ క్రమంలో భారతీ విద్యార్ధుల ఇబ్బందులను తొలగించి వారిని ఆదుకోవాలని ఆసియన్ అమెరికన్ హోటల్ ఓనర్స్ అసోసియేషన్ ఇచ్చిన పిలుపునకు మంచి రెస్పాన్స్ వస్తోంది.

ప్రస్తుత సంక్షోభ సమయంలో భారతీయులను ఆదుకునేందుకు ముందుకు వస్తోన్న భారతీయ హోటళ్లు, భారత- అమెరికన్ హోటల్ యజమానులకు అమెరికాలోని భారత రాయబారి తరన్‌జిత్ సింగ్ సంధూ కృతజ్ఞతలు తెలిపారు.