కరోనా వైరస్ కారణంగా సినిమా రంగానికి తీవ్ర ఆటంకం ఏర్పడింది.మూడు నెలలకు పైగా షూటింగ్లు నిలిచిపోవడంతో సినిమా రంగానికి చెందిన నటీనటులు, టెక్నీషియన్స్ ఇళ్లకే పరిమితం అయ్యారు.
దీంతో భారీ బడ్జెట్ చిత్రాల దగ్గర్నుండి చిన్న చిత్రాల వరకు అందరూ తమ సినిమాలు తిరిగి ఎప్పుడు పట్టాలెక్కుతాయా అని చూస్తున్నారు.కాగా టాలీవుడ్లో తెరకెక్కుతున్న ప్రెస్టీజియస్ మల్టీస్టారర్ మూవీ ఆర్ఆర్ఆర్ కోసం యావత్ ప్రేక్షకులు ఎంతో ఆసక్తిగా ఎదురుచూస్తున్నారు.
దర్శకధీరుడు రాజమౌళి డైరెక్ట్ చేస్తున్న ఈ పీరియాడికల్ మూవీలో హీరోలుగా యంగ్ టైగర్ ఎన్టీఆర్, మెగా పవర్ స్టార్ రామ్ చరణ్లు నటిస్తుండగా హీరోయిన్లుగా ఒలివియా మారిస్, ఆలియా భట్ నటిస్తున్నారు.అయితే రామ్ చరణ్ సరసన ఆలియా భట్ నటిస్తుండగా, ఇప్పుడు ఆమె ఈ సినిమాలో నటిస్తుందా లేదా అనే సందేహం అందరిలో మొదలైంది.
ముంబైలో కరోనా వైరస్ విజృంభన తారా స్థాయిలో ఉండటం, ఇటు హైదరాబాద్లోనూ అదే పరిస్థితి ఏర్పడటంతో ఆలియా ఇప్పట్లో షూటింగ్లలో పాల్గొనబోదని ఆమె సన్నిహితులు అంటున్నారు.
కాగా సంజయ్ లీలా భన్సాలీ దర్శకత్వంలో ఆలియా భట్ నటిస్తున్న సినిమా షూటింగ్ కూడా ఆలియా భట్ కారణంగా వరుసగా వాయిదా పడుతూ వస్తోంది.
ఇప్పుడు ఆర్ఆర్ఆర్ చిత్రం పరిస్థితి కూడా ఇలాగే ఉండటంతో అభిమానులు ఆందోళన చెందుతున్నారు.ఇప్పటికే పలుమార్లు ఆర్ఆర్ఆర్ వాయిదా పడుతూ వస్తుండటంతో జక్కన్న అండ్ టీమ్ చాలా ఆగ్రహం వ్యక్తం చేస్తున్నారు.
ఇప్పుడు మరోసారి ఆలియా భట్ కారణంగా ఈ సినిమా వాయిదా పడుతుండటంతో ఆమె ఈ సినిమాలో నటిస్తుందా లేదా అనే ఆసక్తి సర్వత్రా నెలకొంది.మరి ఆర్ఆర్ఆర్లో ఆలియా భట్ ఎప్పుడు జాయిన్ అవుతుందో తెలియాలంటే మరికొంత కాలం వెయిట్ చేయాల్సిందే.