బాలీవుడ్ విలక్షణ నటుడు ఇర్ఫాన్ ఖాన్ అరుదైన క్యాన్సర్ వ్యాధితో బాధపడుతూ నిన్న(బుధవారం) మృతి చెందిన విషయం నుండి ప్రజలు కోలుకోక ముందే మరో విషాదం చోటు చేసుకుంది.బాలీవుడ్ హీరో, ప్రముఖ నటుడు రిషి కపూర్(67) తాజాగా క్యాన్సర్ వ్యాధితో చికిత్స పొందుతూ ముంబైలోని ఓ ఆసుపత్రిలో మృతిచెందాడు. గతకొంత కాలంగా క్యాన్సర్ వ్యాధితో బాధపడుతున్న రిషి కపూర్, బుధవారం శ్వాస తీసుకోవడానికి ఇబ్బంది పడ్డారు.దీంతో కుటుంబ సభ్యులు ఆయన్ను హుటాహుటిన ముంబైలోని రిలయన్స్ ఆసుపత్రిలో చేర్పించారు.
కాగా ఆసుపత్రిలో చికిత్స తీసుకుంటున్న రిషి కపూర్, గురువారం ఉదయం కన్నుమూసినట్లు ఆసుపత్రి వర్గాలు వెల్లడించాయి.బాలీవుడ్లో కపూర్ ఫ్యామిలీలో హీరో రాజ్ కపూర్ కొడుకుగా ఎంట్రీ ఇచ్చిన రిషి కపూర్, బాబీ సినిమాతో హీరోగా తన ప్రస్థానాన్ని ప్రారంభించారు.
రెండు దశాబ్దాలకు పైగా హీరోగా ప్రేక్షకుల మనసును దోచుకున్న రిషి కపూర్కు బిగ్ బి అమితాబ్ బచ్చన్ చాలా సన్నిహితుడిగా ఉన్నారు.వారిద్దరి కాంబినేషన్లో వచ్చిన సినిమాలు ప్రేక్షకులను అలరించాయి.
రిషి కపూర్ మరణవార్తతో పలువురు సినీ ప్రముఖులు, ప్రేక్షకులు తీవ్ర సంతాపం తెలియజేశారు.