యాదాద్రి జిల్లా:తుర్కపల్లి మండలంలో సీఎం కెసిఆర్ దత్తత తీసుకున్న వాసాలమర్రి గ్రామానికి బస్సు సౌకర్యం లేదని కాంగ్రెస్ పార్టీ నాయకుడు ఓర్సు భిక్షపతి ఆధ్వర్యంలో గజ్వేల్-భువనగిరి ప్రధాన రహదారిపై విద్యార్థులు,గ్రామస్తులు రాస్తారోకో నిర్వహించారు.గంటపాటు ఈ నిరసన చేపట్టడంతో భారీగా ట్రాఫిక్ కు అంతరాయం కలిగింది.
ఈ సందర్భంగా ఓర్సు భిక్షపతి మాట్లాడుతూ సాక్షాత్తు ముఖ్యమంత్రి కేసీఆర్ దత్తత గ్రామానికే ఆర్టీసీ బస్సు సౌకర్యం లేకపోవడం దురదృష్టకరం అన్నారు.ఈ గ్రామం నుండి పాఠశాలకు,కళాశాలకు వెళ్లే విద్యార్థుల పరిస్థితి అగమ్యగోచరంగా మారిందని ఆవేదన వ్యక్తం చేశారు.
దత్తత గ్రామంలో ఈ పరిస్థితి ఉంటే ఇక రాష్ట్రంలో ఇతర గ్రామాల పరిస్థితి ఎలా ఉంటుందో అర్థం చేసుకోవాలని కోరారు.ఇప్పటికైనా సీఎం ప్రత్యేక దృష్టి సారించి గ్రామానికి బస్సు సౌకర్యం కల్పించాలని కోరారు.
