పవన్ కోసం టీడీపీ వెయిటింగ్ ! వదలనంటున్న బీజేపీ ? 

జనసేన అధినేత పవన్ కళ్యాణ్ ను పువ్వులా చూసుకోమని బీజేపీ పెద్దలు తమతో చెప్పారు అంటూ ఏపీ బీజేపీ అధ్యక్షుడు సోము వీర్రాజు పవన్ ను పదేపదే పొగడ్తలతో ముంచెత్తారు.అయితే బీజేపీతో పొత్తు కారణంగా పవన్ ఏపీలో తీవ్రంగా నష్టపోతున్నారు.రాజకీయంగా మరింత బలం పెంచుకోవాల్సిన సమయంలో ఈ పొత్తు జనసేన రాజకీయ ఎదుగుదలకు అడ్డం పడుతోంది.

 ఏపీకి ప్రత్యేక హోదా, విశాఖ స్టీల్ ప్లాంట్ ప్రైవేటీకరణ, పెట్రోల్ డీజిల్, గ్యాస్ ధరల పెరుగుదల, పోలవరం ప్రాజెక్టు ఇలా అనేక అంశాలలో బీజేపీపై జనాల్లో తీవ్ర ఆగ్రహం ఉంది.బిజెపికి మిత్రపక్షంగా జనసేన ఉండడంతో ఈ అంశంలో ఇరుకున పడాల్సి వస్తోంది.

ఏపీలో అధికార పార్టీ వైసీపీ ని విమర్శిస్తున్న జనసేన కేంద్రంలో బిజెపి ప్రజా వ్యతిరేక నిర్ణయాలు తీసుకుంటున్న,  మిత్రపక్షంగా ఉండి తాము ఎందుకు ప్రశ్నించలేకపోతున్నామని, ఏపీకి అన్యాయం చేస్తున్న బిజెపిని పవన్ ప్రశ్నించ లేక పోతున్నారు అనే విమర్శలు ఎదుర్కొంటున్నారు.

ఇదిలా ఉంటే జనసేనతో పొత్తు పెట్టుకునేందుకు టిడిపి కాచుకుని కూర్చుంది.

ఆ పార్టీ సహకారం ఉంటే తప్పనిసరిగా ఏపీలో తాము అధికారంలోకి వస్తామనే నమ్మకంలో ఆ పార్టీ ఉంది.కానీ పవన్ ప్రస్తుతం బిజెపి చట్రంలో ఇరుక్కుపోయి ఉన్నారు.

దాని నుంచి బయటపడేందుకు ప్రయత్నిస్తున్న బీజేపీ మాత్రం పవన్ ను వదిలి పెట్టేందుకు ఏ మాత్రం ఇష్టపడకపోవడం టీడీపీ కి ఇబ్బందికరంగా మారింది.