పుట్టుకతోనే వినికిడి లోపం ఉన్న ఓ పసిపాప తొలిసారి తన తల్లి మాటలు విని ఇచ్చిన రియాక్షన్ ఇప్పుడు ఇంటర్నెట్లో వైరల్గా మారింది.ఇంగ్లండ్లో జరిగిన ఈ ఘటనకు సంబంధించిన వీడియోను సదరు పసిపాప తల్లి సోషల్ మీడియాలో పోస్ట్ చేయడంతో నెటిజన్లు ఆ పాప రియాక్షన్కు ఫిదా అవుతున్నారు.
ఇంగ్లండ్లోని యార్క్షైర్కు చెందిన జార్జినా అనే నాలుగు నెలల పాపకు పుట్టుకతోనే వినికిడిలోపం ఉంది.దీంతో ఆ పాప తల్లిదండ్రులు పాపకు వినికిడి యంత్రాలు అమర్చారు.
వాటి సహాయంతో ఆ పాప శబ్దాలను వినగలగుతోంది.అయితే ఆ యంత్రాలు అమర్చిన వెంటనే తన తల్లి మాటలు విన్న పసిపాప అందంగా నవ్వుతూ ఇచ్చిన రియాక్షన్ ఇప్పుడు సోషల్ మీడియాలో హల్చల్ చేస్తోంది.
తమ పాప తమ మాటలను వినగలుగుతోందని ఆ తల్లి పెట్టిన పోస్టుకు నెటిజన్లు ప్రశంసలు, అభినందనలు తెలుపుతూ తెగ షేర్ చేస్తున్నారు.పాప చాలా బాగుందని, నిండు నూరేళ్లు సంతోషంగా ఉండాలంటూ వారు భగవంతుడిని కోరుకుంటున్నారు.